दोन शिक्षकांमध्ये कपडे फाटेपर्यंत हाणामारी..

एज्युवार्ता न्यूज नेटवर्क 

कोल्हापूर जिल्ह्यातील एका शाळेत दोन शिक्षकांमध्ये जोरदार हाणामारी (Fight between two teachers) झाल्याची धक्कादायक घटना समोर आली आहे. विशेष म्हणजे हा सर्व हाणामारीचा प्रकार मुख्याध्यापकांच्या कार्यालयात घडला आहे. या शिक्षकांना कशाचेच भान राहिले नाही. एकमेकांचे अंगावरचे कपडे फाडेपर्यंत झालेली मारामारी (Fight until clothes are torn) चर्चेचा विषय ठरली आहे. त्यामुळे शिक्षकच असे हाणामारीचे कृत्य करत असतील तर, विद्यार्थ्यांनी त्यांच्याकडून आदर्श काय घ्यावा ? असा सवाल उपस्थित होत आहे. 

जिल्ह्यातील कळे परिसरात घडलेली ही घटना वाऱ्यासारखी राज्यभर पसरली. शिक्षकी पेशा असणाऱ्यांकडे जे आदराने पाहीले जाते ती अभ्रूही वेशीला टांगली गेली. शिवाय या प्रकरणामुळे संस्थेची नाहक बदनामी झाल्याने संस्थाचालकाने दोन्ही शिक्षकांना  सक्तीच्या रजेवर पाठवले आहे. हे शिक्षक एका खाजगी माध्यमिक संस्थेमध्ये कार्यरत होते.  शाळेत इयत्ता आठवी ते दहावी वर्गासाठी इंग्रजी व हिंदी-संस्कृत विषय शिकविणाऱ्या दोन शिक्षकांमध्ये हा वाद झाला. 

या दोन्ही शिक्षकांमध्ये गेल्या काही दिवसांपासून धुसफुस सुरू होती. दुपारच्या सुमारास विद्यार्थ्यांसमोर शिकविताना वर्गात थोडा वाद झाला. त्यानंतर जेवणाच्या सुट्टीत इंग्रजी शिकविणारे संबंधित शिक्षक तक्रार घेऊन मुख्याध्यापकांच्या कार्यालयात गेले. मुख्याध्यापकांनी वाद झालेल्या दुसऱ्या शिक्षकाला कार्यालयात बोलावून वाद निवळण्याचा प्रयत्न केला. मात्र, हा वाद निवळण्याऐवजी मुख्यध्यापकांच्या कार्यालयातच पुन्हा पेटला. दोन्ही शिक्षकांनी एकमेकांना शिवीगाळ करत एकमेकांचे कपडे फाटेपर्यंत हाणामारी केली. काही केल्या वाद मिटत नव्हता मात्र, शाळेतील एका शिपायाने मध्यस्थी करून हा वाद कसाबसा मिटविला. 

हाणामारीचे कारण काय ?

शाळेतील सर्व शिक्षक आणि कर्मचारी आपल्या वेतनातील काही रक्कम स्कूल बसचा मेंटेनन्स, डिझेल खर्च, चालकाचा पगार यांसह शालेय खर्चासाठी प्रत्येक महिन्याला शाळेत जमा करतात. शिक्षकाकडून प्रतिमहा तीन हजार रुपये आणि शिक्षकेतर कर्मचाऱ्यांवर प्रतिमहा दीड हजार रुपये अशी रक्कम त्यांच्या वेतनातून वर्गणी स्वरुपात जमा केली जाते. इंग्रजी शिकविणाऱ्या शिक्षकाकडे या हिशेबाची जबाबदारी आहे. या हिशेबावरून वाद झाला असल्याची माहिती समोर आली आहे.