बहिणाबाई चौधरी विद्यापीठात सेंटर ऑफ एक्सलेंस इन जर्नालिझमची निर्मिती; मंत्रिमंडळाची मान्यता

एज्युवार्ता न्यूज नेटवर्क 

राज्यातील विधानसभा निवडणुकीच्या पार्श्वभूमीवर नुकतीच आचारसंहिता लागू करण्यात आली आहे. त्या अनुषंगाने राज्य सरकारने विविध शासन निर्णय घेण्याचा सपाटा लावल्याचे दिसून येत आहेत. त्यातच आता उत्तर महाराष्ट्रातील कवयित्री बहिणाबाई चौधरी विद्यापीठात (Bahinabai Chaudhary University) स्व. बाळासाहेब ठाकरे सेंटर ऑफ एक्सलेंस इन जर्नालिझम (Creation of Center of Excellence in Journalism) उभारण्यासाठी राज्य शासनाने मंत्रिमंडळाच्या बैठकीत तत्वत: प्रशासकीय मान्यता दिली आहे. 

सेंटर ऑफ एक्सलेंस इन जर्नालिझम उभारण्यासाठी उच्च व तंत्रशिक्षण विभागाकडून शासन निर्णय प्रसिद्ध करण्यात आला आहे. विद्यापीठाच्या माध्यमशास्त्र प्रशाळेचे संचालक डॉ. सुधीर भटकर यांनी विद्यापीठात (स्व.) बाळासाहेब ठाकरे सेंटर ऑफ एक्सलेंस इन जर्नालिझम उभारण्यासाठी महाराष्ट्र शासनाकडे पत्र दिले होते. त्या अनुषंगाने नुकत्याच झालेल्या मंत्रिमंडळाच्या बैठकीत हे सेंटर उभारण्यासाठी २५ कोटी रुपयांच्या कामांना तत्वत: प्रशासकीय मान्यता देण्यात आली.

यामध्ये (स्व.) बाळासाहेब ठाकरे सेंटर ऑफ एक्सलेंस इन जर्नालिझम भवनाच्या बांधकामासाठी ८ कोटी, वसतिगृहाच्या बांधकामासाठी ७ कोटी, दृकश्राव्य केंद्र उपकरणे खरेदीसाठी ५ कोटी आणि केंद्रात शिक्षण घेणाऱ्या विद्यार्थ्यांना फेलोशिप देण्यासाठी, तसेच आवश्यक मनुष्यबळ पुरविण्यासाठी ५ कोटी, अशा एकूण २५ कोटींच्या कामांना तत्वत: प्रशासकीय मान्यता दिली आहे. यामुळे विद्यापीठातील पत्रकारिता विभाग अपडेट होण्यास मदत होणार आहे. राज्य मंत्रिमंडळाच्या उच्च व तंत्र शिक्षण विभागाने घेतलेल्या या निर्णयाचे विद्यापीठ प्रशासनाने आभार मानले आहेत.