पूजा खेडकरवर मोठी कारवाई; प्रशिक्षण रद्द करून अकादमीत परतण्याचे आदेश

एज्युवार्ता न्यूज नेटवर्क 

Pooja Khedkar Latest News : वादात सापडलेल्या प्रशिक्षणार्थी IAS अधिकारी पूजा खेडकर (IAS officer Pooja Khedkar)हिच्यावर मोठी कारवाई करण्यात आली आहे. त्यांचे प्रशिक्षण रद्द करण्यात आले असून त्यांना अकादमीत परतण्याच्या सूचना देण्यात आल्या आहेत. मिळालेल्या माहितीनुसार, सरकारने पूजा खेडकरचे आयएएस प्रोबेशन पुढे ढकलले असून तिला लाल बहादूर शास्त्री नॅशनल ॲकॅडमी ऑफ ॲडमिनिस्ट्रेशनमध्ये (LBSNAA) रिपोर्ट करण्यास सांगण्यात आले आहे. LBSNAA अतिरिक्त मुख्य सचिव नितीन गद्रे यांनी खेडकरला यासंदर्भात पत्र पाठवले आहे. "तुमचा जिल्हा प्रशिक्षण कार्यक्रम स्थगित ठेवण्याचा आणि पुढील आवश्यक कार्यवाहीसाठी तुम्हाला ताबडतोब परत बोलावण्याचा निर्णय घेतला आहे," असे या पत्रात नमूद करण्यात आले आहे. 

पूजा खेडकर ही २०२३ च्या बॅचची आयएएस अधिकारी आहे. पूजा खेडकरवर स्वत:ला ओबीसी नॉन-क्रिमी लेयर श्रेणीतून असल्याचा दावा करून यूपीएससीमध्ये निवड झाल्याचा आरोप आहे. मानसिकदृष्ट्या अपंग असल्याचा खोटा दावा केल्याचाही  तिच्यावर आरोप आहे. अलीकडे तिच्या व्हीआयपी ट्रिटमेंटच्या मागणीवरून वादात सापडली. त्यानंतर तिची पुण्याहून वाशीम येथे बदली झाली.

पूजा खेडकरवर अनेक गंभीर आरोप आहेत. प्रशिक्षण काळात तिने सरकारी निवास, कर्मचारी, कार आणि कार्यालयात स्वतंत्र केबिनची मागणी केली, तिच्या वैयक्तिक ऑडी कारवर लाल-निळे दिवे आणि महाराष्ट्र सरकारचा लोगो लावला. तिने चोरीच्या आरोपात अटक केलेल्या ट्रान्सपोर्टरला सोडण्यासाठी डीसीपी दर्जाच्या अधिकाऱ्यावर दबाव आणला. तसेच आयएएस होण्यासाठी तिने खोट्या कागदपत्रांचा वापर केला आणि यूपीएससी फॉर्ममध्ये स्वत:ला ओबीसी नॉन-क्रिमी लेयर म्हणून घोषित केले. ती 40 टक्के दृष्टिदोषी होती आणि काही मानसिक आजाराने ग्रस्त असल्याचा दावा करण्यात आला होता. मात्र, ती प्रत्येक वेळी मेडिकलच्या वेळी हजर राहिली नाही. असेही आरोप पुजावर आहेत.