बार्टीचा नवीन AI प्रमाणपत्र कोर्स आणि सोबत ४ हजारांचा स्टायपेंड 

एज्युवार्ता न्यूज नेटवर्क 

डॉ. बाबासाहेब आंबेडकर संशोधन व प्रशिक्षण संस्थेच्या (Barti) वतीने राज्यातील अनुसूचित जातींमधील (Scheduled Caste Students) युवक-युवतींसाठी अडीच महिन्यांचा आर्टिफिशियल इंटेलिजन्स (AI) प्रमाणपत्र कोर्स राबविण्यात येणार आहे.  हा कोर्स करणाऱ्या विद्यार्थ्यांना एआय कोर्सचे प्रमाणपत्र आणि सोबत ४ हजार रुपयांचा स्टायपेंड (Stipend of 4 thousand) देखील मिळणार आहे. 

अत्याधुनिक तंत्रज्ञानासोबत राहण्यासाठी हा कोर्स उपयुक्त ठरणार आहे. यामुळे विद्यार्थ्यांना रोजगाराच्या नवीन संधी उपलब्ध होतील आणि त्यांची कौशल्ये विकसित होतील. हा कोर्स छत्रपती संभाजीनगर, जालना, बुलडाणा, वाशिम, यवतमाळ, अमरावती, परभणी, पुणे, सोलापूर, लातूर, रायगड, नाशिक, कोल्हापूर, धुळे, सांगली यांसह विविध ठिकाणी राबविण्यात येणार आहे. बार्टीच्या या उपक्रमामुळे अनेक युवकांना भविष्य घडविण्याची उत्तम संधी उपलब्ध होणार असल्याचे बार्टीकडून सांगण्यात आले आहे. 

एआय प्रमाणपत्र कोर्ससाठी एका बॅचला २५० विद्यार्थ्यांना प्रवेश दिला जाणार आहे. त्यासाठी १८ ते ३५ वयोगटातील अनुसूचित जातींमधील सर्व महाविद्यालयीन उमेदवार पात्र असणार आहेत. विद्यार्थ्यांची निवड गुणवत्ता निकषांवर केली जाणार आहे. निवड प्रक्रियेसाठी परीक्षा किंवा मुलाखत घेण्याचे नियोजन बार्टीकडून करण्यात येणार आहे. त्यानंतर पात्र उमेदवारांची यादी बार्टीच्या संकेतस्थळावर प्रकाशित करण्यात येणार आहे. 
______________________________________

माहिती-तंत्रज्ञानात क्षेत्रात झपाट्याने बदल होत आहेत. आधुनिक शिक्षण पद्धतीला तंत्रज्ञानाची जोड मिळाल्याने तरुणांना रोजगारक्षम शिक्षण घेणे आवश्यक झाले आहे. ही गरज लक्षात घेऊन बार्टीने एआय प्रमाणपत्र प्रशिक्षण कोर्स सुरू करण्याचा निर्णय घेतला आहे. या कोर्समुळे विद्यार्थांना माहिती-तंत्रज्ञान क्षेत्रासह इतर विभागांमध्येही रोजगार मिळवू शकतील. हा कोर्स विद्यार्थ्यांना त्यांच्या भविष्यातील रोजगार आणि उद्योगात देखील उपयोगी ठरणार आहे. 

पल्लवी गायकवाड, पी. एचडी संशोधक विद्यार्थिनी बार्टी