बीडमध्ये BLO शिक्षकाला बेदम मारहाण करणाऱ्या ४ जणांवर गुन्हे: शिक्षकांमध्ये भीतीचे वातावरण
आरोपींनी शिक्षकांना शिवीगाळ करत तोंडावर चापटबुक्क्यांनी बेदम मारहाण केली आणि जीवे मारण्याची धमकी दिली. या हल्ल्यामुळे शासकीय काम पूर्णपणे ठप्प झाले. उपस्थित कर्मचारी शेख जामीन आणि सय्यद हसन यांनी मध्यस्थी करून परिस्थिती नियंत्रणात आणली.
Eduvarta
एज्युवार्ता न्यूज नेटवर्क
बीड जिल्ह्यातील (Beed Crime News) परळी शहरात शासकीय कर्तव्य बजावणाऱ्या एका बीएलओ शिक्षकाला (BLO teacher) घरगुती काम न केल्याच्या कारणावरून बेदम मारहाण (Severe beating) करण्यात आल्याची धक्कादायक घटना समोर आली आहे. या प्रकारामुळे मतदान केंद्रस्तरीय अधिकारी (बीएलओ) म्हणून काम करणाऱ्या शिक्षकांमध्ये भीतीचे (Fear among teachers) वातावरण निर्माण झाले आहे. यापूर्वीही अशा प्रकारच्या मारहाणीच्या घटना घडल्याने शिक्षक वर्गात असुरक्षिततेची भावना (A sense of insecurity among teachers) वाढली आहे.
प्राथमिक माहितीनुसार, मलीकपुरा येथील रहिवासी महेफूज जाकीर शेख (४२ वर्षे) हे नगर परिषदेच्या विशेष सखोल पुनरीक्षण कार्यक्रमांतर्गत भाग क्रमांक २१२ मध्ये बीएलओ म्हणून कार्यरत आहेत. ते शादीखाना येथे आयोजित शासकीय कॅम्पमध्ये मतदार नोंदणी फॉर्म भरण्याचे काम करत असताना पेठ मोहल्ल्यातील शाकेर अहमद शेख, जुनेद शेख, शोएब शेख आणि एका अनोळखी व्यक्तीने त्यांच्याकडे येऊन 'आमच्या घरी फॉर्म घेण्यास का आला नाहीस' अशी विचारणा केली. त्यानंतर शाकेर अहमद याने शिक्षकांच्या हातातील शासकीय कागदपत्रे हिसकावून फेकून दिली.
आरोपींनी शिक्षकांना शिवीगाळ करत तोंडावर चापटबुक्क्यांनी बेदम मारहाण केली आणि जीवे मारण्याची धमकी दिली. या हल्ल्यामुळे शासकीय काम पूर्णपणे ठप्प झाले. उपस्थित कर्मचारी शेख जामीन आणि सय्यद हसन यांनी मध्यस्थी करून परिस्थिती नियंत्रणात आणली. या घटनेमुळे शासकीय कामात अडथळा निर्माण केल्याचा गंभीर प्रकार समोर आला आहे.
या प्रकरणी परळी शहर पोलीस ठाण्यात भारतीय न्याय संहिता २०२३ अंतर्गत चार जणांविरुद्ध गुन्हा दाखल करण्यात आला आहे. पुढील तपास पोलीस हेड कॉन्स्टेबल पुरुषोत्तम बन्सिधर काळे करत आहेत. शिक्षकांवर होणारे हल्ले थांबवण्यासाठी प्रशासनाने कठोर पावले उचलावीत, अशी मागणी शिक्षक संघटनांकडून होत आहे.
