शाळा सुरू करण्याचा निर्णयात बदल करण्याची शिक्षण विभागावर नामूष्की, थेट कोर्टानेच दिले निर्देश

विदर्भातील प्रचंड उष्णतेमुळे राज्याच्या शिक्षण विभागाने (Department of Education) या क्षेत्रातील शाळा २२ जूनपासून सुरू करण्याचा निर्णय घेतला होता. मात्र, मुंबई उच्च न्यायालयाच्या नागपूर खंडपीठाने (Nagpur Bench) त्याला स्थगिती देत नवीन आदेश (New order) दिले आहे. त्यानुसार, आता विदर्भातील सर्व शाळा ३० जूनपासून सुरू (School starts from June 30th) करण्यात येणार आहेत. या निर्णयामुळे विद्यार्थी, शिक्षक आणि पालकांना काही अतिरिक्त दिवसांचा कालावधी मिळणार आहे.

महाराष्ट्र राज्य प्राथमिक शिक्षक समितीने १५ जूनपासून विदर्भात शाळा सुरू करण्याच्या विरोधात उच्च न्यायालयात याचिका दाखल केली होती. या याचिकेवर आज बुधवारी १० जून रोजी न्यायमूर्ती अनिल किल्लोर आणि न्यायमूर्ती राजेश वाकोडे यांच्या खंडपीठासमोर सुनावणी झाली. यावेळी कोर्टाने हे आदेश दिले आहेत, अशी माहिती समितीचे राज्य कार्याध्यक्ष विजय कोंबे यांनी दिली. 

सुनावणीदरम्यान दोन्ही बाजूंचे युक्तिवाद ऐकल्यानंतर खंडपीठाने शासनाच्या निर्णयावर असहमती व्यक्त केली. न्यायालयाने १५ जून किंवा २२ जूनपासून शाळा सुरू करण्यासंबंधीच्या शिक्षण संचालकांच्या आदेशांना रद्द केले. तसेच २० एप्रिल २०२३ रोजीच्या शासन निर्णयाप्रमाणे शाळा सुरू करण्याचे स्पष्ट निर्देश दिले. या निर्णयामुळे विदर्भातील शाळा ३० जून रोजी सुरू होणार असल्याचे स्पष्ट झाले आहे.

न्यायालयाचा आदेश प्राप्त झाल्यानंतर शिक्षण विभाग लवकरच नवे परिपत्रक जारी करणार आहे. माध्यमिक व उच्च माध्यमिक शिक्षण संचालक डॉ. महेश पालकर यांनी सांगितले की, “कोर्टाच्या आदेशानुसार ३० जूनपासून शाळा सुरू करण्याबाबतचे परिपत्रक प्रसिद्ध केले जाईल.” या निर्णयाचा विदर्भातील हजारो शाळा, लाखो विद्यार्थी आणि शिक्षकांवर थेट परिणाम होणार आहे.