अल्पवयीन विद्यार्थिनीवर मेट्रो स्टेशनच्या लिफ्टमध्ये विनयभंग, एकटी पाहिलं अन् नको ते कृत्य... 

एज्युवार्ता न्यूज नेटवर्क 

मुंबईतील (Mumbai Crime ) सार्वजनिक वाहतूक व्यवस्था महिलांसाठी कितपत सुरक्षित आहे, असा गंभीर प्रश्न निर्माण करणारी एक संतापजनक घटना समोर आली आहे. मुंबईतील एका मेट्रो स्टेशनवर (Metro Station) 17 वर्षीय अल्पवयीन विद्यार्थिनीचा विनयभंग (Molestation) करण्यात आल्याची धक्कादायक घटना घडली आहे. कांदिवली पश्चिमेतील (Kandivali West) डहाणूकरवाडी मेट्रो स्थानकात हा प्रकार घडला असून, या घटनेमुळे महिला प्रवाशांच्या सुरक्षेचा प्रश्न पुन्हा एकदा ऐरणीवर आला आहे.

मिळालेल्या माहितीनुसार, पीडित 17 वर्षीय विद्यार्थिनी डहाणूकरवाडी मेट्रो स्टेशनवर आली होती. प्लॅटफॉर्म क्रमांक 1 वर जाण्यासाठी तिने लिफ्टचा वापर केला. त्यावेळी लिफ्टमध्ये ती एकटी असल्याचे पाहून एका अज्ञात व्यक्तीने तिच्याशी गैरवर्तन केल्याचा आरोप आहे. अचानक घडलेल्या या प्रकारामुळे विद्यार्थिनी घाबरून गेली. लिफ्टचे दार बंद असल्याचा फायदा घेत आरोपीने तिचा विनयभंग केल्याचे तक्रारीत नमूद करण्यात आले आहे. मुंबई पोलिसांनी POCSO कायद्यांतर्गत व भारतीय न्याय संहितेनुसार FIR नोंदवली आहे. आरोपी अद्याप फरार असून, परिसरातील सीसीटीव्ही फुटेजच्या आधारे त्याचा शोध घेतला जात आहे.

गेल्या काही वर्षांत शिक्षणासाठी मुलींचे स्थलांतर आणि प्रवास मोठ्या प्रमाणात वाढला आहे. ग्रामीण भागातून शहरांमध्ये, तसेच शहरातील एका भागातून दुसऱ्या भागात जाण्यासाठी विद्यार्थिनी मेट्रो, बस आणि रेल्वेचा मोठ्या प्रमाणावर वापर करतात. अशा परिस्थितीत सार्वजनिक वाहतूक व्यवस्था सुरक्षित असणे ही केवळ सुविधा नसून विद्यार्थ्यांचा मूलभूत अधिकार मानला जातो.

या प्रकरणातील सर्वात धक्कादायक बाब म्हणजे घटना घडलेल्या लिफ्ट परिसरात सीसीटीव्ही कॅमेरे नसल्याचे समोर आले आहे. शिक्षणासाठी प्रवास करणाऱ्या विद्यार्थिनींच्या सुरक्षेसाठी संवेदनशील ठिकाणी देखरेख यंत्रणा सक्षम असणे आवश्यक असताना अशी त्रुटी आढळल्याने पालकांमध्येही चिंता वाढली आहे. अशा घटना विद्यार्थिनींच्या मानसिक आरोग्यावर परिणाम करू शकतात. अनेकदा भीतीमुळे मुली एकट्याने प्रवास टाळतात, काही वेळा क्लासेस किंवा शैक्षणिक उपक्रमांमध्ये सहभागी होण्यासही घाबरतात. त्यामुळे सुरक्षित वातावरणाचा थेट संबंध विद्यार्थ्यांच्या शैक्षणिक प्रगतीशी जोडला जात असल्याचे मत व्यक्त करण्यात येत आहे

या घटनेनंतर मेट्रो प्रशासन, स्थानिक प्रशासन आणि पोलिसांनी विद्यार्थिनींच्या सुरक्षेसाठी विशेष उपाययोजना करण्याची गरज व्यक्त होत आहे. सीसीटीव्ही कव्हरेज वाढवणे, महिला सुरक्षा पथके तैनात करणे, आपत्कालीन हेल्पलाइन अधिक प्रभावी करणे आणि शैक्षणिक संस्थांच्या परिसरातील वाहतूक व्यवस्थेवर विशेष लक्ष देणे आवश्यक असल्याची मागणी होत आहे.