कनव्हेशन सेंटरसाठी विद्यापीठाला दोनशे कोटी ; विद्यापीठ प्रकल्पासाठी घाई करत असल्याचा आरोप

एज्युवार्ता न्यूज नेटवर्क 

सावित्रीबाई फुले पुणे विद्यापीठ (Savitribai Phule Pune University)आवारात एका नामांकित उद्योगपतीने तब्बल दीडशे ते दोनशे कोटी रुपयांचा कनव्हेशन सेंटरचा (Convention Center) प्रकल्प उभा करण्याची तयारी दर्शवली आहे. त्यावर विद्यापीठाच्या अधिकार मंडळात गेल्या काही महिन्यांपासून चर्चा केली जात आहे.मात्र, या प्रकल्पाला व्यवस्थापन परिषदेतील (Management Council) काही सदस्यांनी घाई-घाईने हा प्रकल्प मंजूर करू नये,अशी भूमिका घेतली आहे. तर हा प्रकल्प विद्यापीठात उभा राहिला तर विद्यापीठातील संशोधनाला चालनाच मिळेल.त्यामुळे प्रकल्पाचा पूर्ण अभ्यास करून व सारासार विचार करून मगच त्याला मान्यता दिली जाईल,असे विद्यापीठाच्या इतर काही व्यवस्थापन परिषद सदस्यांनी सांगितले. 

विद्यापीठाच्या पर्यावरणशास्त्र विभागासमोरील भारतरत्न डॉ.बाबासाहेब आंबेडकर यांच्या पुतळ्याच्या मागील 8 ते 9 एकर जागेत कनव्हेशन सेंटर प्रकल्प उभा करण्याचा प्रस्ताव आहे. काही दिवसांपूर्वी विद्यापीठाच्या व्यवस्थापन परिषदेचे सदस्य यांनी या उद्योगपतीची भेटही घेतली.त्यात प्राथमिक चर्चा करण्यात आली.त्यावर दोन दिवसांपूर्वी विद्यापीठाच्या व्यवस्थापन परिषदेची बैठक होती. मात्र, बैठक सुरू होण्यापूर्वी कुलगुरू डॉ. सुरेश गोसावी यांच्या कार्यालयात बंद दाराआड सुमारे दीड तास काही महत्वाच्या विषयांवर चर्चा झाली. त्यानंतर व्यवस्थापन परिषदेची बैठक सुरू झाली.त्यात उद्योगपतीकडून आलेला प्रकल्प चर्चेसाठी मांडण्यात आला. परंतु, त्यांची सर्व कागदपत्र व केला जाणारा करार वाचल्याशिवाय त्यास मंजूरी दिली जाणार नाही,असे मत अनेक सदस्यांनी मांडले. 

विद्यापीठातील वरिष्ठ अधिकाऱ्यांशी यावर चर्चा केली असता सखोल चर्चेनंतर आणि व्यवस्थापन परिषदेच्या मंजूरीनंतरच हा प्रकल्प उभा करण्यास मान्यता देण्यात येईल,असे सांगितले जात आहे.

दरम्यान, कुलसचिव नियुक्तीचा वाद पेटलेला असताना व्यवस्थापन परिषदेच्या बैठकीत त्यावर कोणतीही चर्चा झाली नाही.त्यामुळे बैठकीपूर्वी त्यावर चर्चा करण्यात आली होती का ? प्रश्न उपस्थित केला जात आहे. 

-----------------------------------

कनव्हेशन सेंटर हा विद्यापीठासाठी उपयुक्त ठरेल.मात्र, त्यास मंजूरी देण्यापूर्वी विद्यापीठाकडून केल्या जाणाऱ्या करारात नेमके काय म्हटले आहे, त्याचा अभ्यास करावा लागेल.भविष्यात या प्रकल्पामुळे कोणालाही अडचणी निर्माण होणार नाही. हे तपासून मगच या प्रकल्पा मंजूरी दिली जाईल.विद्यापीठाने त्यासाठी आवश्यक कागदपत्र वाचण्यासाठी पाठवली आहेत.

- डॉ. रविद्र शिंगणापूरकर, सदस्य, व्यवस्थापन परिषद, सावित्रीबाई फुले पुणे विद्यापीठ 

------------------------------------------

विद्यापीठाकडून कनव्हेशन सेंटरबाबत कोणतीही घाई केली जात नाही. विद्यापीठाने या प्रकल्पासंदर्भातील माहिती सर्व सदस्यांना पाठवली आहे. विद्यापीठातर्फे केल्या जाणाऱ्या कारारनाम्याचे बारकाईने वाचन करून त्यावर सविस्तर चर्चा केल्यानंतर त्यावर अंतिम निर्णय घेतला जाईल. 

- राजेंद्र विखे पाटील, सदस्य, व्यवस्थापन परिषद, सावित्रीबाई फुले पुणे विद्यापीठ 

-------------------------------------------

एका उद्योगपतींच्या नावे करायच्या प्रकल्पासाठी घनदाट झाडी असलेली ७ ते ९ एकर जमिन देण्याच्या ठरावाची लगबग कुलगुरू कार्यालयाकडून सुरु आहे.  आमची भूमिका आहे की करारनामाची मूळ कॉपी पहिल्याशिवाय आणि त्यातील विद्यापीठ हिताच्या सुधारणा झाल्याशिवाय आम्ही मंजुरी देणार नाही. व्यवस्थापन परिषदेच्या सभेत यासाठी तत्वतः मंजुरी देण्याचा घाट घातला गेला होता. पण मी त्याला स्पष्ट विरोध केला. पुढे योग्य वेळी त्यावर सविस्तर भूमिका मांडेल. 

सागर वैद्य, सदस्य, व्यवस्थापन परिषद, सावित्रीबाई फुले पुणे विद्यापीठ