प्राध्यापकांच्या मेडिकल लिव वर आता मर्यादा ; UGC चे निर्देश काय सांगतात?

एज्युवार्ता न्यूज नेटवर्क 

आता प्राध्यापाक रजेवर हक्क म्हणून दावा करू शकणार नाहीत. आजारी असल्याचे कारण पुढे करत त्यांना उठ-सुठ सुट्या घेता येणार नाही. (University teachers will not be able to claim leave) विद्यापीठ अनुदान आयोग (University Grants Commission) UGC ने  'UGC रेग्युलेशन 2025' च्या मसुद्यासह प्रथमच मार्गदर्शक तत्त्वे तयार केली आहेत. (Guidelines have been prepared for the first time with the draft of 'UGC Regulations 2025) यामध्ये प्रथमच शिक्षकांसाठी पाच मुद्यांवर सर्वसाधारण कर्तव्येही नमूद करण्यात आली आहेत. यामध्ये प्राध्यापकांच्या मेडिकल लिव सहित इतर सुटयांवर देखील मर्यादा आल्या आहेत.

नवीन मार्गदर्शक तत्त्वांनुसार, वैद्यकीय रजेच्या नावाखाली वारंवार रजेवर जाणाऱ्या शिक्षकांवर कडक कारवाई होणार आहे. आजारपणाच्या नावाखाली अल्पावधीत कोणी रजा मागितली, तर त्याला वैद्यकीय अधिकाऱ्याकडून शारीरिक तपासणीसाठी पाठवले जाईल, जेणेकरून अचूक निदान करता येईल. त्याआधारे संबंधित शिक्षकाला घरी आराम करण्याची गरज आहे की ते ड्यूटी वर जॉइन होण्यास सक्षम आहेत, याचा निर्णय घेतला जाईल. 

वैद्यकीय कारणास्तव रजेसाठी अर्ज करताना नोंदणीकृत वैद्यकीय अधिकाऱ्याचे वैद्यकीय प्रमाणपत्र असणे आवश्यक आहे. वैद्यकीय प्रमाणपत्र देणारे वैद्यकीय अधिकारी हे बॅचलर ऑफ मेडिसिन आणि बॅचलर ऑफ सर्जरी (MBBS) किंवा त्याच्या समकक्ष असणे आवश्यक आहे. या प्रमाणपत्रात आजाराचे स्वरूप आणि संभाव्य कालावधी देखील नमूद करावा लागेल. वैद्यकीय कारणास्तव रजेवरून परतणाऱ्या शिक्षकांनाही फिटनेस प्रमाणपत्र सादर करावे लागणार आहे.

नवीन मार्गदर्शक तत्त्वांनुसार, जेव्हा कामावर असणे आवश्यक असेल तेव्हा, रजा मंजूर करणाऱ्या अधिकार्‍यांना कोणतीही रजा नाकारण्याचा किंवा रद्द करण्याचा अधिकार असेल. तथापि, शिस्तभंगाच्या कारणाशिवाय शिक्षकांना रजेवर जाण्याची सक्ती केली जाणार नाही. प्राध्यापकांना त्यांच्या विनंतीवरून रजा दिली जाऊ शकते. रजेदरम्यान ते पूर्णवेळ किंवा अर्धवेळ इतर कोणतीही नोकरी, व्यापार किंवा व्यवसायात करू शकत नाही. यामध्ये सार्वजनिक सेवा किंवा इतर प्रासंगिक स्वरूपाच्या कामात सूट देण्यात आली आहे.

विशेष म्हणजे, शिक्षकाने मंजूर रजेच्या कालावधीनंतर लगेचच कामावर रुजू होणे बंधनकारक आहे. जर कोणी तसे केले नाही तर ते ओव्हरस्टे मानले जाईल. या अंतर्गत, रजा किंवा सुट्टीचे वेतन नाकारले जाऊ शकते. अशा ओव्हरस्टेला संबधित प्राध्यापकाचे गैरवर्तणूक मानले जाऊ शकते.