शिक्षकांकडे दिवाळी सुट्टीत नवीन जबाबदारी; विशेष शालेय स्वच्छता मोहीम राबवण्याचे परिपत्रक प्रसिद्ध
आगामी दिवाळीच्या सुट्टीचा सकारात्मक उपयोग करून “चला शाळेत जाऊ या … विशेष शालेय स्वच्छता मोहीम” राबविण्याचे निर्देश देण्यात आले आहेत. विद्यार्थ्यांसाठी शाळा परिसर अधिक स्वच्छ, सुंदर, सुरक्षित आणि आनंददायी राहावा तसेच अध्ययन-अध्यापनासाठी पोषक वातावरण तयार व्हावे, हा या मोहिमेचा मुख्य उद्देश आहे.
Eduvarta
एज्युवार्ता न्यूज नेटवर्क
महाराष्ट्र शासनाच्या शालेय शिक्षण विभागाने राज्यातील सर्व शासकीय व अनुदानित शाळांसाठी एक महत्त्वपूर्ण परिपत्रक जारी केले आहे. आगामी दिवाळीच्या सुट्टीचा सकारात्मक उपयोग करून “चला शाळेत जाऊ या … विशेष शालेय स्वच्छता मोहीम” राबविण्याचे निर्देश देण्यात आले आहेत. विद्यार्थ्यांसाठी शाळा परिसर अधिक स्वच्छ, सुंदर, सुरक्षित आणि आनंददायी राहावा तसेच अध्ययन-अध्यापनासाठी पोषक वातावरण तयार व्हावे, हा या मोहिमेचा मुख्य उद्देश आहे. समग्र शिक्षा योजनेच्या पार्श्वभूमीवर शाळा व्यवस्थापन समिती, शिक्षक, पालक, माजी विद्यार्थी, ग्रामस्थ आणि स्थानिक समुदायाला एकत्र आणून “माझी शाळा-माझी जबाबदारी” या भावनेतून ही मोहीम हाती घेण्यात आली आहे.
मोहिमेचा पहिला टप्पा १८ ते २४ ऑक्टोबर २०२६ दरम्यान राबविला जाणार आहे. या कालावधीत नियोजन आणि पूर्वतयारीवर भर दिला जाईल. शाळा व्यवस्थापन समितीची बैठक घेणे, वर्गखोल्या, प्रयोगशाळा, ग्रंथालय, संगणक कक्ष, क्रीडांगण आणि पिण्याच्या पाण्याच्या व्यवस्थेची सविस्तर पाहणी करणे आवश्यक आहे. तसेच आवश्यक दुरुस्ती आणि निरुपयोगी भंगार साहित्याची यादी तयार करून कृती आराखडा बनवण्याचे स्पष्ट निर्देश देण्यात आले आहेत.
दुसरा टप्पा २५ ते ३१ ऑक्टोबर २०२६ दरम्यान प्रत्यक्ष कारवाईचा असेल. यात शाळांची सखोल साफसफाई केली जाईल. वर्गखोल्यांची स्वच्छता, स्वच्छतागृहांची विशेष साफसफाई, पाण्याच्या टाक्यांची सफाई, कचरा वर्गीकरणाची योग्य व्यवस्था तसेच विद्युत उपकरणे व फर्निचरची किरकोळ दुरुस्ती यांना प्राधान्य दिले जाणार आहे. विद्यार्थ्यांच्या सुरक्षिततेच्या उपाययोजनांवरही विशेष लक्ष केंद्रित केले जाईल.
या मोहिमेसाठी शाळांना कोणताही अतिरिक्त किंवा स्वतंत्र निधी दिला जाणार नाही. समग्र शिक्षा अंतर्गत मिळणाऱ्या एकत्रित अनुदानातून नियमानुसार खर्च भागवण्याची मुभा आहे. विशेष बाब म्हणजे विद्यार्थ्यांकडून सक्तीची आर्थिक वर्गणी गोळा करण्यास सक्त मनाई करण्यात आली आहे. मुख्याध्यापक, केंद्रप्रमुख, गटशिक्षणाधिकारी ते शिक्षणाधिकारी या सर्व स्तरांवर जबाबदाऱ्या निश्चित करण्यात आल्या आहेत.
प्रत्येक शाळेने मोहीम सुरू करण्यापूर्वी आणि पूर्ण झाल्यानंतरची छायाचित्रे जतन करून ठेवावीत, असे आदेश आहेत. या व्यापक मोहिमेमुळे राज्यातील शाळांचे रूपडे पालटून विद्यार्थ्यांसाठी आरोग्यदायी व प्रेरणादायी वातावरण निर्माण होईल, असा विश्वास व्यक्त केला जात आहे. शिक्षक या नव्या जबाबदारीस कितपत गांभीर्याने घेतात, हे पाहणे महत्त्वाचे ठरणार आहे.
