SSC ; नोंदणीपासून अर्ज भरण्यापर्यंतची संपूर्ण प्रक्रिया आता मोबाईलवर

एज्युवार्ता न्यूज नेटवर्क 

सरकारी नोकरीची तयारी करणाऱ्या तरुणांसाठी एक मोठी बातमी आहे. स्टाफ सिलेक्शन कमिशन (staff selection commission) (SSC) ने त्यांच्या भरती परीक्षेची अर्ज प्रक्रिया आणखी सोपी आणि सोयीस्कर केली आहे. आता उमेदवारांना त्यांच्या मोबाईल फोनवरून संपूर्ण अर्ज भरता येईल, तेही कोणत्याही सायबर कॅफे किंवा ऑपरेटरच्या मदतीशिवाय. (Candidates can now fill out the entire application form from their mobile phones)

SSC ने त्यांचे mySSC मोबाईल अॅप पूर्णपणे अपग्रेड केले आहे. आता या अॅपद्वारे, नोंदणीपासून अर्ज भरण्यापर्यंतची संपूर्ण प्रक्रिया मोबाईलवरच पूर्ण करता येते. विशेष म्हणजे आता या अॅपमध्ये आधार OTP आणि फेस ऑथेंटिकेशनची सुविधा देखील उपलब्ध आहे.

SSC चेअरमन एस. गोपालकृष्णन म्हणाले की, "हे नवीन अॅप विशेषतः ग्रामीण भागातील उमेदवारांसाठी खूप फायदेशीर ठरेल, ज्यांना आता कोणत्याही संगणक केंद्रात जाण्याची आवश्यकता राहणार नाही. SSC ने जारी केलेल्या सूचनेनुसार, जून २०२५ पासून होणाऱ्या सर्व परीक्षांमध्ये ही मोबाईल अॅप आधारित अर्ज प्रणाली लागू होईल. हे अॅप गुगल प्ले स्टोअरवरून डाउनलोड करता येईल."

या नवीन सुविधेमुळे आता उमेदवार सर्व SSC परीक्षांसाठी फक्त मोबाईलवरून अर्ज करू शकतात.  उमेदवार  आधार क्रमांकासह ओटीपी किंवा फेस ऑथेंटिकेशन करून स्वतःची पडताळणी करू शकतात. उमेदवार  कोणत्याही मध्यस्थाशिवाय संपूर्ण अर्ज प्रक्रिया पूर्ण करू शकतात. 

हे अॅप फक्त अँड्रॉइड आवृत्ती ११ किंवा त्यावरील मोबाईलवर काम करेल. उमेदवारांना त्यांच्या फोनमध्ये आधार फेस आरडी अॅप देखील इन्स्टॉल करावे लागेल, जेणेकरून फेस ऑथेंटिकेशन प्रक्रिया पूर्ण करता येईल.

 एसएससीने स्पष्ट केले आहे की उमेदवारांनी ओटीआर (वन टाइम रजिस्ट्रेशन) फॉर्ममध्ये भरलेली माहिती अंतिम मानली जाईल. आधार कार्डमध्ये नोंदवलेल्या माहितीमध्ये कोणताही बदल केला जाणार नाही.