आज मिळणार GATE 2025 चे हॉल तिकीट

एज्युवार्ता न्यूज नेटवर्क  

पदवीधर अभियांत्रिकी अभियोग्यता चाचणी (Graduate Engineering Aptitude Test) GATE 2025 मध्ये सहभागी होणाऱ्या उमेदवारांसाठी महत्वाची माहिती समोर आली आहे. इंडियन इन्स्टिट्यूट ऑफ टेक्नॉलॉजी रुरकीच्या (Indian Institute of Technology Roorkee) IIT अधिकृत वेबसाइटवर हॉल तिकीटाविषयी माहिती देण्यात आली आहे. अधिकृत महितीनुसार येत्या 7 जानेवारी 2025 रोजी हॉल तिकीट डाउनलोड करण्यासाठी उपलब्ध करून देण्यात येणार आहे. (Admit cards will be made available for download on 7th January 2025) उमेदवार लॉगिन क्रेडेन्शियल्स टाकून ते डाउनलोड करू शकतील.

GATE 2025 परीक्षा 1, 2, 15 आणि 16 फेब्रुवारी 2025 रोजी देशभरातील नियुक्त परीक्षा केंद्रांवर घेतली जाईल. परीक्षा दोन शिफ्टमध्ये होणार आहे. पहिल्या शिफ्टची परीक्षा सकाळी 9:30 ते 12:30 या वेळेत घेतली जाईल, तर दुसऱ्या शिफ्टची परीक्षा दुपारी 2:30 ते 5:30 या वेळेत घेतली जाईल.

हॉल तिकीट डाउनलोड करण्यासाठी उमेदवारांना प्रथम https://gate2025.iitr.ac.in/ या अधिकृत वेबसाइटला भेट द्यावी लागेल. तुम्हाला वेबसाइटच्या होम पेजवर ॲडमिट कार्ड लिंकवर क्लिक करावे लागेल. आता तुम्हाला आवश्यक तपशील (लॉगिन क्रेडेन्शियल्स) एंटर करून ते सबमिट करावे लागतील. त्यानंतर स्क्रीनवर ॲडमिट कार्ड उघडेल जिथून तुम्ही ते डाउनलोड करू शकता आणि त्याची प्रिंटआउट घेऊ शकता.

उमेदवारांनी हे लक्षात ठेवावे की, जेव्हा ते परीक्षा केंद्रावर जातील तेव्हा त्यांनी हॉल तिकीटाची प्रत आणि मूळ ओळखपत्र सोबत ठेवणे बंधनकारक असेल. प्रवेशपत्र आणि ओळखपत्राशिवाय उमेदवारांना परीक्षा हॉलमध्ये प्रवेश दिला जाणार नाही.