घसरलेल्या NIRF रँकिंगवरून अधिसभेत घमासान; रँकिंग वाढवण्यासाठी काय करणार?

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (SPPU)घसरलेल्या NIRF रँकिंग वरून विद्यापीठाच्या अधिसभेत मंगळवारी जोरदार चर्चा झाली. विद्यापीठ प्रशासनातील या बाबत काम करणारे अधिकारी घसरलेल्या NIRF रँकिंगसाठी जबाबदार असताना अधिसभा सदस्य व व्यवस्थापन परिषद सदस्य यांच्या राजीनाम्याची मागणी केली जात आहे,ही बाब चुकीची असून विद्यापीठाने घसरलेल्या रँकिंगच्या कारणांचा शोध घेऊन त्यात सुधारणा करण्यासाठी प्रयत्न करावेत.घसरलेल्या रँकिंगची कुलगुरूंनी जबादारी घ्यावी.केवळ विद्यापीठाच्या विभागांचा विचार न करता संलग्न महाविद्यालयांच्या गुणवत्ता वाढीचा विचार करावा, अशी मागणी करत सिनेट सदस्यांनी विद्यापीठ प्रशासनाला धारेवर धरले.

केंद्रीय शिक्षण मंत्रालयातर्फे जाहीर करण्यात आलेल्या नॅशनल इन्स्टिट्यूशनल रँकिंग फ्रेमवर्क अर्थात NIRf रँकिंगमध्ये सावित्रीबाई फुले पुणे विद्यापीठाचे रँकिंग ९१पर्यंत खाली घसरले. त्यावर चिंता व्यक्त करत विद्यापीठावर टीका केली जात आहे. त्याचेच पडसाद मंगळवारी विद्यापीठाच्या अधिसभेत उमटले. अधिसभा सदस्य सचिन गोरडे पाटील यांनी याबाबत अधिसभेत स्थगन प्रस्ताव सादर केला. त्यावर चर्चा करताना विद्यापीठाच्या गुणवत्तेबरोबर संशोधनात होत असलेल्या वाड.मय चौर्य यावर चर्चा करण्यात आली. संशोधनात खर्च केला जात नसल्याने सदस्यांनी नाराजी व्यक्त केली.विद्यापीठाच्या गुणवत्तावाढीसाठी पुढे काय केले जाणार आहे, याचा जाब विचारण्यात आला. त्यावर विद्यापीठाचे कुलगुरू डॉ. सुरेश गोसावी यांनी याबाबत सादरीकरण दिले. पण सादरीकरण नको उपाययोजना करा, अशी भूमिका काही सदस्यांनी घेतली.

विद्यापीठ पुढील काळात संशोधनासाठी ग्रँट वाढवणार, शिक्षक विद्यार्थी गुणोत्तर वाढण्यासाठी प्रयत्न करणार, परराज्यातील विद्यार्थी, ट्रान्स जेंडर आदी विद्यार्थ्यांवर भर दिला जाईल, असे गोसावी यांनी सांगितले. एकूणच अधिसभेचे सदस्य NIRF रँकिंग वरून आक्रमक झाल्याचे पाहायला मिळाले.

विद्यापीठाशी संबंधित आजी- माजी लोकांनी विद्यापीठाच्या बाहेर रँकिंगवर बोलू नये तर विद्यापीठाच्या अधिकाऱ्यांना सांगून पुढे रँकिंग वाढीवर काम करावे, असेही अधिसभा सदस्यांनी सांगितले.