SET EXAM : सेट विभागाच्या प्रमुखपदी डॉ.प्रभाकर देसाई; परीक्षा नियोजित कालावधीत होणार
सुमारे एक ते दोन महिने सेट विभागाच्या प्रमुख पदाची धुरा कोणाकडे द्यावी ? याबाबत विद्यापीठ प्रशासनाकडून विचार केला जात होता. परीक्षा विभागाच्या संचालक पदी डॉ राजेंद्र तलवारे यांची पूर्ण वेळ नियुक्ती झाल्यामुळे डॉ.देसाई यांना सेट विभागाच्या प्रमुख पदाची जबाबदारी सांभाळण्यासाठी वेळ देणे शक्य होणार आहे.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या सेट विभागाच्या प्रमुख पदाची जबाबदारी विद्यापीठाच्या परीक्षा व मूल्यमापन मंडळाचे प्रभारी संचालक डॉ.प्रभाकर देसाई यांच्याकडे सोपविण्यात आला आहे. त्यामुळे महाराष्ट्र व गोवा राज्यातील उमेदवारांसाठी आयोजित केली जाणारी सेट परीक्षा नियोजित वेळापत्रकानुसार घेणे शक्य होणार आहे. काही दिवसांपासून सेट विभागाचे प्रमुख पद रिक्त होते. त्यामुळे विद्यापीठ वर्तुळात उलट सुलट चर्चा केल्या जात होत्या. आता या चर्चांना पूर्णविराम मिळाला आहे.
सेट विभागाचे माजी प्रमुख डॉ. बाळासाहेब कापडणीस यांनी पदभार सोडल्यानंतर डॉ. अविनाश कुंभार यांच्याकडे काही महिने सेट विभागाच्या प्रमुख पदाची जबाबदारी सोपविण्यात आली होती.परंतु, कुंभार यांना एमकेसीएल येथे अधिक चांगल्या पदावर काम करण्याची संधी मिळाल्यामुळे त्यांनी सेट विभागाचे प्रमुख पद सोडले होते.त्यानंतर सुमारे एक ते दोन महिने सेट विभागाच्या प्रमुख पदाची धुरा कोणाकडे द्यावी ? याबाबत विद्यापीठ प्रशासनाकडून विचार केला जात होता. परीक्षा विभागाच्या संचालक पदी डॉ राजेंद्र तलवारे यांची पूर्ण वेळ नियुक्ती झाल्यामुळे डॉ.देसाई यांना सेट विभागाच्या प्रमुख पदाची जबाबदारी सांभाळण्यासाठी वेळ देणे शक्य होणार आहे.
विद्यापीठ अनुदान आयोगाच्या निर्देशानुसार सावित्रीबाई फुले पुणे विद्यापीठाच्या सेट विभागातर्फे महाराष्ट्र व गोवा राज्यातील उमेदवारांची परीक्षा आयोजित केली जाते. प्रत्येक परीक्षेला सुमारे एक ते सव्वा लाख विद्यार्थी परीक्षेसाठी नोंदणी करतात. साधारणपणे जून व डिसेंबर महिन्यात सेट परीक्षा आयोजित केली जाते. परंतु या पुढील परीक्षा केव्हा घेतली जाणार याबद्दल अद्याप अधिकृत घोषणा करण्यात आली नाही. मात्र, आता सेट विभागाला कार्यक्षम अधिकारी मिळाल्यामुळे परीक्षा नियोजित वेळापत्रकानुसार होईल, अशी अपेक्षा व्यक्त केली जात आहे.
---------------
विद्यार्थी हित लक्षात घेऊन विद्यापीठाने पुढील सेट परीक्षेची तयारी सुरू केली आहे. परीक्षा यूजीसीच्या निर्देशानुसार नियोजित कालावधीत घेतली जाईल. विद्यापीठ प्रशासनातर्फे डॉ. प्रभाकर देसाई यांच्याकडे सेट विभागाच्या प्रमुख पदाची जबाबदारी सोपविण्यात आली आहे. - डॉ. प्रफुल्ल पवार, प्रभारी कुलसचिव, सावित्रीबाई फुले पुणे विद्यापीठ, पुणे
