धक्कादायक: बोगस शासन निर्णयावर कॉलेज राजरोसपणे सुरू; चौकशीनंतर संस्थाचालक, मुख्याध्यापकांविरोधात गुन्हा दाखल
अहमदनगर जिल्ह्यातील पाथर्डी तालुक्यातील सुसरे येथील ओम साई बहुउद्देशीय संस्थेच्या पुण्यातील विमाननगर परिसरातील स्वामी विवेकानंद ज्युनिअर कॉलेज (इन्स्पायर कॉलेज) आणि हडपसर परिसरातील स्वामी विवेकानंद ज्युनिअर कॉलेजची (एपीके कॉलेज) शिक्षण विभागाकडून तपासणी करण्यात आली.
eduvarta@gmail.com 
एज्युवार्ता न्यूज नेटवर्क
बोगस शालार्थ आयडीचे प्रकरण ताजे असताना आता पुण्यात विमान नगर व हडपसर परिसरात बोगस शासन निर्णयाच्या आधारे दोन जूनियर कॉलेज सुरू असल्याची धक्कादायक माहिती समोर आली आहे. शिक्षण विभागाने या प्रकरणी तपासणी करून संबंधित कॉलेजचे मुख्याध्यापक व संस्थाचालक यांच्या विरोधात पोलिसांकडे गुन्हा दाखल केला आहे. त्यामुळे अहिल्यानगर जिल्ह्यातील पाथर्डी येथील एका संस्थेने पुण्यात शिक्षणाचा बाजार मांडल्याचे उघड झाले आहे. तब्बल पाच वर्षापासून हे कॉलेज राजरोसपणे सुरू आहे.
तत्कालीन शिक्षण आयुक्त सुरज मांढरे यांच्या कार्यकाळात सीबीएसई बोर्डाच्या बोगस मान्यता पत्रावर चालणाऱ्या अनेक शाळांवर कारवाई करण्यात आली होती. त्यानंतर आता अहमदनगर जिल्ह्यातील पाथर्डी तालुक्यातील सुसरे येथील ओम साई बहुउद्देशीय संस्थेच्या पुण्यातील विमाननगर परिसरातील स्वामी विवेकानंद ज्युनिअर कॉलेज (इन्स्पायर कॉलेज) आणि हडपसर परिसरातील स्वामी विवेकानंद ज्युनिअर कॉलेजची (एपीके कॉलेज) शिक्षण विभागाकडून तपासणी करण्यात आली. त्यात संबंधित संस्थेकडे बनावट अध्यादेश व मान्यता पत्र असल्याचे आढळून आले. त्यामुळे संबंधित संस्थेविरोधात शिक्षण विभागाने कारवाई केले आहे.
जळगाव जिल्ह्यातील रंभा लक्ष्मी बहुउद्देशीय संस्था मेहरून या शाळेस इयत्ता अकरावी बारावी मराठी माध्यम सर्व शाखा राज्य मंडळाची मान्यता दिलेली असताना या संदर्भाचा उपयोग ओम साई बहुउद्देशीय संस्थेने स्वामी विवेकानंद ज्युनिअर कॉलेज हडपसर या कॉलेजसाठी बनावट मान्यता पत्र तयार केले. तर विमान नगर येथील स्वामी विवेकानंद ज्युनिअर कॉलेजसाठी पुणे जिल्ह्यातील खेड तालुक्यातील नव महाराष्ट्र इंग्लिश मीडियम स्कूल खराबवाडी या संस्थेला दिलेल्या मान्यता पत्राच्या संदर्भाचा उपयोग स्वतःच्या बनावट मान्यता पत्रासाठी केला. त्यामुळे संस्थेने व मुख्याध्यापकाने शासनाची व विद्यार्थ्यांची फसवणूक केल्याप्रकरणी संबंधितांविरोधात पोलिसांकडे गुन्हा दाखल करण्यात आला. जिल्हा परिषद माध्यमिक शिक्षणाधिकारी डॉ.भाऊसाहेब कारेकर यांच्या सूचनेनुसार शिक्षण अधिकारी पद्मा धेंडे यांनी याप्रकरणी समर्थ पोलीस स्टेशन येथे जाऊन तक्रार दाखल केली आहे.
---------------------
मंत्रालयापर्यंत चौकशी होणार का?
बोगस मान्यता पत्र देण्याचा प्रकार स्थानिक पातळीवर होत नाही तर याचे धागेद्वारे मंत्रालयापर्यंत पोहोचले असल्याचे यापूर्वी निष्पन्न झाले होते. पाथर्डी येथील ओम साई बहुउद्देशीय संस्थेने यासंदर्भातील अध्यादेश स्वतः तयार केले की मंत्रालयातील अधिकारी कर्मचारी यांच्याकडून तयार करून घेतले याची चौकशी होणे गरजेचे आहे. बोगस शालार्थ आयडी प्रकरणामुळे शिक्षण खाते बदनाम झालेले असताना आता बनावट शासन निर्णयाचे प्रकरण समोर आल्याने शिक्षण खात्याची अब्रू पुन्हा एकदा वेशीवर टांगली गेली आहे.
----------------
शिक्षण विभागाच्या निदर्शनास आलेल्या माहितीच्या आधारे स्वामी विवेकानंद ज्युनिअर कॉलेजची तपासणी केली असता त्यांच्याकडे बनावट शासन निर्णय असल्याचे आढळून आले. त्यानुसार संबंधितांविरोधात पोलिसांकडे तक्रार दिली आहे. संबंधित ज्युनिअर कॉलेजमधील विद्यार्थ्यांच्या प्रवेशाबाबत लवकरच निर्णय घेतला जाईल.
- डॉ l. भाऊसाहेब कारेकर, माध्यमिक शिक्षण अधिकारी, जिल्हापरिषद पुणे
