डॉ.मनोहर सानप यांचे सस्पेन्शन; कुलसचिव पदाबाबत नवा ट्विस्ट 

एज्युवर्ता न्यूज नेटवर्क 

मॉडर्न एज्युकेशन सोसायटीच्या वाडिया कॉलेजचे प्राध्यापक डॉ. मनोहर सानप यांचे सस्पेन्शन करण्यात आले असल्याची धक्कादायक माहिती समोर आली आहे. संस्थेअंतर्गत केली जाणारी चौकशी पूर्ण होईपर्यंत त्यांचे सस्पेन्शन करण्यात आले असल्याचे संस्थेने महाविद्यालयाला कळविले आहे. त्यामुळे शिक्षण क्षेत्रात एकच खळबळ उडाली आहे. परंतु,या वृत्तामुळे सावित्रीबाई फुले पुणे विद्यापीठाच्या कुलसचिव पदाच्या नियुक्तीबाबत नवा ट्विस्ट निर्माण झाला आहे.

सावित्रीबाई फुले पुणे विद्यापीठाच्या कुलसचिव पदाबाबत गेल्या काही दिवसांपासून वादंग निर्माण झाले होते. वादग्रस्त व्यक्तीची निवड कुलसचिव पदी करू नये,अशी मागणी काही सामाजिक व राजकीय संघटनांकडून करण्यात आली होती. या संघटनांकडून विद्यापीठाच्या कुलसचिव पदी संभाव्य उमेदवार म्हणून डॉ. मनोहर सानप यांची नियुक्ती केली जाणार असल्याचा दावा केला जात होता. दोन दिवसांपूर्वी विद्यापीठाने कुलसचिव पदाबाबत प्राप्त झालेल्या तक्रारींची शहानिशा करण्यासाठी निवृत्त न्यायाधीश यांच्या अध्यक्षतेखाली समिती स्थापन करून तक्रारदारांची म्हणणे ऐकून घेतले होते.

दरम्यान, मॉर्डन एज्युकेशन सोसायटीकडून वाडिया महाविद्यालयातील डॉ. मनोहर सानप यांचे सस्पेन्शन केल्याचे वृत्त समोर आल्याने उलट सुलट चर्चांना उधाण आले आहे. मात्र, याबाबत संस्थेच्या पदाधिकाऱ्यांशी व महाविद्यालयाच्या प्राचार्यांशी संपर्क साधण्याचा प्रयत्न केला असता संपर्क होऊ शकला नाही. परंतु, सानप यांचे सस्पेन्शन करण्यात असल्याचे पत्र सोशल मीडियावर व्हायरल झाले आहे.

-------------------

सावित्रीबाई फुले पुणे विद्यापीठाच्या कुलसचिव पदासाठी उमेदवार म्हणून ज्यांच्या नावाची चर्चा गेल्या काही दिवसांपासून सुरू आहे, अशा डॉ. मनोहर सानप यांच्यावर मॉडर्न एज्युकेशन सोसायटीकडून निलंबनाची कारवाई करण्यात आली आहे, अशा निलंबित झालेल्या व्यक्तीची विद्यापीठ कुलसचिव म्हणून नियुक्ती करणार का ?याचा खुलासा विद्यापीठ प्रशासनाने करावा.

-कल्पेश यादव, सहसचिव, युवासेना