शाळेच्या वेळेत मुख्याध्यापिका झोपेत; संतप्त पालकांनी शाळेला ठोकले कुलूप, व्हिडिओ व्हायरल

एज्युवार्ता न्यूज नेटवर्क

यवतमाळ जिल्ह्यातून एक शिक्षण क्षेत्रात खळबळ उडवून देणारी बातमी समोर आली आहे. जिल्हा परिषद प्राथमिक शाळा, खंडाळा (ZP School, Khandala) येथे शाळेच्या वेळेत मुख्याध्यापिका अस्ताव्यस्त अवस्थेत झोपलेल्या (Headmistress asleep during school hours) आढळल्याची धक्कादायक घटना उघडकीस आली आहे. यामुळे संतप्त पालकांनी शाळेला कुलूप ठोकले (Parents locked the school) आणि संबंधित शिक्षिकेची तातडीने बदली करण्याची मागणी (Teacher's request for a transfer) केली. शाळा व्यवस्थापन समितीचे अध्यक्ष सुधीर वासुदेव ढोके यांनी गटशिक्षणाधिकारी मंगेश देशपांडे यांच्याकडे लेखी तक्रार दाखल केली आहे. घटनेचा व्हिडिओ सोशल मीडियावर व्हायरल (Video goes viral on social media) झाल्याने ग्रामस्थांमध्ये संतापाचे वातावरण आहे.

तक्रारीनुसार, अध्यक्षांचा मुलगा शाळेतून घरी आल्यानंतर “मॅडम शाळेत झोपल्या आहेत,” अशी माहिती दिली. सुधीर ढोके शाळेत गेल्यावर मुख्याध्यापिका झोपलेल्या अवस्थेत आढळल्या. त्यांच्या पतीने शिक्षक नसतानाही मुख्याध्यापकांच्या खुर्चीवर बसून मद्यधुंद अवस्थेत पालकांशी अरेरावी आणि दमदाटी केल्याचा आरोप करण्यात आला आहे. रुजू झाल्यापासून शिक्षिकेच्या अनियमित उपस्थितीमुळे इयत्ता पहिली ते चौथीच्या विद्यार्थ्यांच्या गुणवत्ता आणि पटसंख्येवर विपरीत परिणाम झाला असल्याचे ग्रामस्थांचे म्हणणे आहे. अनेक पालकांनी मुलांना शाळेतून काढून नेर येथील इतर शाळांमध्ये प्रवेश दिला आहे. 

घटनेची माहिती मिळताच वटफळी केंद्रप्रमुख यांनी घटनास्थळी भेट देऊन पंचनामा केला. मात्र, तोपर्यंत शिक्षिका पतीसह निघून गेल्याचे समोर आले. निवडणुकीच्या SIR कामातही त्यांनी जबाबदारी पार पाडली नसल्याचा आरोप तक्रारीत करण्यात आला आहे. पालकांनी शिक्षिकेची तातडीने बदली करण्याची मागणी केली असून, अन्यथा आंदोलन करण्याचा इशारा दिला आहे. 

गटशिक्षणाधिकारी मंगेश देशपांडे यांनी तक्रार प्राप्त झाल्याची पुष्टी केली. शिक्षिकेविरुद्ध शिस्तभंगाची कारवाई प्रस्तावित करून वरिष्ठांकडे पाठविण्यात येणार असल्याचे त्यांनी सांगितले. तत्पूर्वी तात्पुरती बदली करण्यात आली आहे. या घटनेने ग्रामीण भागातील शालेय शिक्षण व्यवस्थेवर प्रश्नचिन्ह उभे राहिले असून, पालक आणि ग्रामस्थ न्यायाची अपेक्षा करत आहेत.