विद्यापीठाची अधिसभा 30 नोव्हेंबरला; निवडणुकीनंतर शैक्षणिक वातावरण तापणार
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाची (Savitribai Phule Pune University)अधिसभा येत्या 30 नोव्हेंबर रोजी आयोजित करण्यात आली आहे. विद्यापीठाच्या अधिसभेत (C-NET) कोणत्या विषयावरून वातावरण तापणार ? हे पाहणे उत्सुकतेचे ठरणार आहे.सध्या विधानसभा निवडणुकीचे(Assembly Elections)वारे वाहत असले तरी अधिसभेच्या बैठकीपूर्वी राज्यात नवीन सरकार (New Govt) स्थापन होऊ शकते. त्याचाही कमी अधिक परिणाम अधिसभेवर झालेला दिसून येऊ शकतो, असेही बोलले जात आहे.
विद्यापीठाच्या मागील अधिसभेमध्ये प्राध्यापकांची रिक्त पदे, प्रभारी कुलसचिव, प्रभारी अधिष्ठाता यांसह विद्यापीठात झालेल्या विविध आंदोलनावरून मोठी चर्चा रंगली होती. गेल्या काही महिन्यांमध्ये विद्यापीठातील वसतिगृहाचा प्रश्न उपहारगृहांचा प्रश्न जामखेड येथील रत्नदीप कॉलेजमधील विद्यार्थ्यांचा शैक्षणिक प्रश्न,मराठी भाषेला अभिजात भाषेचा दर्जा मिळालेला असताना पुणे विद्यापीठाशी संलग्न महाविद्यालयामध्ये विद्यार्थ्यांना मराठी विषय घेऊ न देणे,सत्र पूर्तता झाल्यानंतर निर्माण झालेला पीआरएन ब्लॉकचा विषय, अशा काही घडामोडी समोर आल्या आहेत.
शैक्षणिक घडामोडींबरोबरच विद्यापीठाच्या भविष्यातील वाटचाली संदर्भातही जोरदार चर्चा होण्याची शक्यता आहे. सावित्रीबाई फुले पुणे विद्यापीठाने परदेशात चार ठिकाणी उपकेंद्र सुरू करण्यासंदर्भात निर्णय घेतला आहे. तसेच QS रँकिंगमध्ये विद्यापीठाने चांगली कामगिरी केली आहे. त्यामुळे या घटनांवर सुध्दा सकारात्मक चर्चा होण्याची शक्यता आहे.काही अधिसभा सदस्यांनी प्रश्न व ठराव सादर केले आहेत.त्यामुळे विविध विषय अधिसभेसमोर मांडले जाणार आहेत,असे विश्वासनिय सूत्रांनी सांगितले.
