कुलगुरू यांच्यावर झालेल्या आरोपांचे खंडन करणारे प्रकटन विद्यापीठाकडून प्रसिद्ध

एज्युवार्ता न्यूज नेटवर्क 

सावित्रीबाई फुले पुणे विद्यापीठाचे कुलगुरू डॉ सुरेश गोसावी यांच्या विरोधात विद्यापीठाचे व्यवस्थापन परिषद सदस्य सागर वैद्य यांनी पुण्यासह नाशिक जिल्हा आंदोलन केले. तसेच माझी व माझ्या कुटुंबाची बदनामी करण्यात आली असून माझ्या जीवाला धोका असल्याचा आरोप सागर वैद्य यांनी केला . त्याला आता विद्यापीठ प्रशासनाने जाहीर प्रकटन प्रसिद्ध करून उत्तर दिले आहे. त्यात सर्व आरोपांचे विद्यापीठाचे कुलगुरू डॉ. सुरेश गोसावी यांचेकडून खंडन करण्यात आले आहे.

विद्यापीठातर्फे प्रसिद्ध करण्यात आलेल्या प्रकटनानुसार व्यवस्थापन परिषदेच्या एका सदस्याने अधिसभेच्या २७ व २८ मार्च, २०२६ रोजीच्या सभेमध्ये सावित्रीबाई फुले पुणे विद्यापीठाचे कुलगुरू डॉ. सुरेश गोसावी यांनी सदर व्यवस्थापन परिषद सदस्य आणि त्यांच्या कुटुंबियांच्या बदनामीचे कटकारस्थान रचल्याचा आरोप करून कुलगुरू यांचेकडून त्यांच्या जीविताला धोका असल्याचे सांगत अधिसभेच्या बैठकीच्या दुस-या दिवशी सभागृहाच्या दारात ठिय्या आंदोलन केले होते. या व्यवस्थापन परिषद सदस्याने विद्यापीठाच्या विश्रामगृहातील त्यांच्या व त्यांच्या कुटुंबियांच्या मुक्कामाचे सी सी टी व्ही फुटेज मिळवून त्याचा गैरवापर झाल्याचाही आरोप केला. तसेच आरोपांच्या अनुषगांने त्यांनी विविध वृत्तपत्रांमध्ये तसेच समाज माध्यमांमध्ये कुलगुरू डॉ. सुरेश गोसावी यांच्या विरोधात तशा अर्थाचे वृत्त प्रसारित केले आहे. तसेच सदर व्यवस्थापन परिषद सदस्याने या अनुषगांने पुण्यातील चतुःश्रृंगी पोलिस स्टेशन येथे तक्रार दाखल केली आहे.

कुलगुरू डॉ. सुरेश गोसावी यांच्या विरूध्द करण्यात आलेल्या सदर आरोपांमध्ये कोणतेही तथ्य नाही. विद्यार्थी संघटनेकडून या बाबत विद्यापीठास प्राप्त झालेल्या पत्रामध्ये कोणत्याही व्यक्तीच्या नावाचा उल्लेख नसून सी सी टी व्ही फुटेजची मागणीदेखील करण्यात आलेली नाही. तसेच विद्यापीठाच्या संबंधित विभागाकडेदेखील सी सी टी व्ही फुटेज उपलब्ध करून देण्याची मागणी प्राप्त झालेली नाही. तरीदेखील या प्रकरणामध्ये गैरसमजातून विद्यापीठाचे कुलगुरू  डॉ. सुरेश गोसावी यांचेविरूध्द चुकीचे व तथ्यहीन आरोप करण्यात आले.त्याचप्रमाणे विविध वृत्तपत्रे व समाज माध्यमांमध्ये या अनुषंगाने कुलगुरू यांचेविषयी अत्यंत चुकीच्या पध्दतीने क्लेषदायक आणि बदनामीकारक मजकूर प्रसिध्द करण्यात आला आहे. या सर्व आरोपांचे विद्यापीठाचे कुलगुरू डॉ. सुरेश गोसावी यांचेकडून खंडन करण्यात येत आहे, असे या प्रकटनात नमूद करण्यात आले आहे.

---------------------

विद्यापीठातर्फे हे परिपत्रक ज्यांनी काढले त्यांची नियुक्ती तरी कायदेशीर आहे का..? भाकरे मॅडम यांनी कुलसचिव पदाचा चार्ज सोडला त्याचे परिपत्रक आणि चारुशीला गायके यांना कुलसचिव पदाचा चार्ज दिल्याचे परिपत्रक तरी आजपर्यंत विद्यापीठाने जाहीर केले आहे का…? आम्ही अनेकदा मागून दिलेले नाही. आधी ते काढावे म्हणजे हे त्यांच्या अधिकारात आहे की नाही ते ठरवू, असो.पुरावे नष्ट करून झाल्यावर इतक्या उशिराने परिपत्रक काढले आहे का…? पोलिस तपासात सत्य उघड होईलच, असे व्यवस्थापन परिषद सदस्य सागर वैद्य सांगितले