विद्यापीठाच्या परीक्षा विभागाच्या संचालक पदी राजेंद्र तलवारे; अखेर पूर्णवेळ संचालक मिळाले 

एज्युवार्ता न्यूज नेटवर्क 

सावित्रीबा फुले पुणे विद्यापीठाच्या परीक्षा व मूल्यमापन मंडळाच्या संचालक पदी डॉ.राजेंद्र तलवारे यांची निवड झाली आहे.विद्यापीठाच्या संकेतस्थळावर याबाबतची अधिकृत घोषणा करण्यात आली आहे. त्यामुळे विद्यापीठाच्या परीक्षा विभागाला आता पूर्णवेळ संचालक मिळाले आहेत.

सावित्रीबाई फुले पुणे विद्यापीठाचे कार्यक्षेत्र पुणे ,अहिल्यानगर आणि नाशिक या तीन जिल्ह्यांमध्ये विस्तारले आहे.विद्यापीठाशी संलग्न असणाऱ्या महाविद्यालयांमध्ये विद्यार्थ्यांची संख्या सुमारे साडेसात लाख एवढी आहे. त्यामुळे परीक्षा विभागाचे संचालक पद म्हणजे काटेरी मुकुटा प्रमाणे आहे.विद्यापीठाचे परीक्षा विभागाचे माजी संचालक डॉ.महेश काकडे यांचा कार्यकाल संपुष्टात आल्यानंतर डॉ. प्रभाकर देसाई यांच्याकडे संचालक पदाची अतिरिक्त जबाबदारी देण्यात आली होती. सुमारे वर्षभर त्यांनी या पदावर काम केले. 

विद्यापीठाने पूर्णवेळ परीक्षा संचालक पदाच्या नियुक्ती बाबत जाहिरात प्रसिद्ध केली होती. त्यानंतर प्राप्त झालेल्या अर्जांची छाननी करून पात्र उमेदवारांची मुलाखत 7 एप्रिल रोजी घेण्यात आली. शासन निर्णयानुसार परीक्षा संचालकांच्या मुलाखतीची प्रक्रिया पूर्ण झाल्यावर त्याच दिवशी किंवा दुसऱ्या दिवशी निवड झालेल्या उमेदवाराचे नाव जाहीर करणे आवश्यक आहे. त्यानुसार विद्यापीठाने परीक्षा विभागाच्या संचालक पदी डॉ.राजेंद्र तलवारे यांची निवड झाल्याचे जाहीर करण्यात आले आहे.

तलवारे हे सध्या मुंबई येथील रतन टाटा स्किल विद्यापीठात कुलसचिव म्हणून कार्यरत आहेत.ते मुळचे पुण्यातील व्हिआयटी संस्थेतील प्राध्यापक आहेत. यापूर्वी त्यांनी विद्यापीठाच्या परीक्षा विभागात काम केले आहे.