जगातील सर्वांत मोठा पुस्तक महोत्सव पुण्यात:चंद्रशेखर बावनकुळे
जगातील सर्वांत मोठा पुस्तक महोत्सव पुण्यात होईल, त्यासाठी मुख्यमंत्री देवेंद्र फडणवीस यांनी सांगितल्याप्रमाणे सरकारकडून महोत्सवाला सर्वतोपरी मदत केली जाईल.
eduvarta@gmail.com 
एज्युवार्ता न्यूज नेटवर्क
पुणे पुस्तक महोत्सव देशासाठी, महाराष्ट्रासाठी अभिमानास्पद आहे. हा महोत्सव देशाला पुढे घेऊन जाणारा, पंतप्रधानांच्या संकल्पाला पुढे नेणारा, महाराष्ट्र विकसित करणारा आणि महाराष्ट्राची उंची वाढत आहे, अशी भावना राज्याचे कॅबिनेटमंत्री चंद्रशेखर बावनकुळे यांनी व्यक्त केली. तसेच जगातील सर्वांत मोठा पुस्तक महोत्सव पुण्यात होईल, त्यासाठी मुख्यमंत्री देवेंद्र फडणवीस यांनी सांगितल्याप्रमाणे सरकारकडून महोत्सवाला सर्वतोपरी मदत केली जाईल, अशी ग्वाही त्यांनी दिली.
राष्ट्रीय पुस्तक न्यासतर्फे फर्ग्युसन महाविद्यालयाच्या मैदानावर आयोजित पुणे पुस्तक महोत्सवाला बावनकुळे यांनी सोमवारी भेट दिली. त्या वेळी बावनकुळे बोलत होते. पुणे पुस्तक महोत्सवाचे संयोजक राजेश पांडे, संयोजन समितीचे सदस्य प्रसेनजित फडणवीस, भाजपचे शहराध्यक्ष धीरज घाटे, राघवेंद्र मानकर या वेळी उपस्थित होते.
बावनकुळे म्हणाले,गेल्या वर्षीही मी या महोत्सवाला आलो होतो. त्यावेळी उत्तम प्रतिसाद असल्याचे पाहिले होते. यंदाचा महोत्सव तर अधिक मोठा आहे, त्यामुळे प्रतिसादही गेल्यावर्षीच्या तुलनेत जास्त आहे. महोत्सवातील तरुणाईचा मोठ्या प्रमाणात आहे. त्यामुळे तरूण पिढी वाचन करत नाही गैरसमज आहे. आजच्या तरुणाईचा पौराणिक, ऐतिहासिक पुस्तकांकडे तरुणांचा ओढा आहे. या पु्स्तकांच्या वाचनातून ते आपली संस्कृती जपत आहेत. पुस्तक वाचनातून समाज मजबूत होतो. पुस्तकांमुळे माणसाची उंची वाढते. राजकारण्यांनीही वाचनासाठी वेळ काढला पाहिजे. राजकारण्यांनी पुस्तके वाचल्यास ज्ञान वाढून समाजातील शेवटच्या अंधाऱ्या घरात उजेड नेता येईल.
पुणे पुस्तक महोत्सवासारखा महोत्सव ठाणे, मुंबई, नागपूर, छत्रपती संभाजीनगर येथेही झाल्यास तेथील नागरिकांचे पुस्तक प्रेम वाढेल. विभागीय केंद्रांवरही आता लक्ष दिले पाहिजे. राजेश पांडे यांच्या नेतृत्त्वाखाली अनेक कार्यक्रम यशस्वी झाले आहेत. मेरा माटी मेरा देश या कार्यक्रमाची देशात चर्चा झाली होती, असेही बावनकुळे यांनी सांगितले.
पांडे म्हणाले, पुणे पुस्तक महोत्सवाच्या माध्यमातून वाचन, पुस्तकाची चळवळ करण्याचा प्रयत्न आहे. गेल्या दोन दिवसांत पुणेकरांची महोत्सवाला भरभरून प्रतिसाद दिला आहे. आतापर्यंत अडीच लाखांपेक्षा अधिक पुणेकरांनी भेट दिली आहे, पुस्तकांची खरेदी केली आहे. सांस्कृतिक कार्यक्रमांनाही उत्तम प्रतिसाद लाभतो आहे. पुणेकरांनी हा पुस्तक महोत्सव यशस्वी करून दाखवला आहे.
----------------------------------------------
पुणे श्रमिक पत्रकार संघातर्फे छायाचित्र प्रदर्शनाचे आयोजन
पुणे श्रमिक पत्रकार संघातर्फे वृत्तपत्र छायाचित्रकारांच्या छायाचित्र प्रदर्शनाचे पुणे पुस्तक महोत्सवात उद्घाटन चंद्रशेखर बावनकुळे यांच्या हस्ते झाले. पुणे पुस्तक महोत्सवाचे संयोजक राजेश पांडे, पुणे श्रमिक पत्रकार संघाचे अध्यक्ष सुनीत भावे, सरचिटणीस मीनाक्षी गुरव, विश्वजित पवार, पवन खेंगरे या वेळी उपस्थित होते. पत्रकारांच्या छायाचित्र प्रदर्शनातून वर्षभरातील घटनांची आठवण करून दिली, असे बावनकुळे यांनी सांगितले.
