11 प्रवेशाची प्रतीक्षा संपली ; गुणवत्ता यादी जाहीर, 30 जूनपासूनच प्रवेश सुरू

एज्युवार्ता न्यूज नेटवर्क 

राज्याच्या माध्यमिक शिक्षण संचालक कार्यालयातर्फे इयत्ता अकरावी प्रवेश प्रक्रियेसंदर्भात नवीन प्रकटन शनिवारी दि. 28 जून रोजी प्रसिद्ध करण्यात आले आहे.  त्यानुसार 28 जून रोजी सायंकाळी 5 वाजता विद्यार्थ्यांची प्रवेशाची गुणवत्ता यादी जाहीर केली जाणार आहे. तर विद्यार्थ्यांना 30 जून ते 7 जुलै या कालावधीत संबंधित कनिष्ठ महाविद्यालयात जाऊन आपला प्रवेश निश्चित करता येणार आहे. त्याचप्रमाणे दुसऱ्या फेरीसाठी 9 जुलै रोजी रिक्त जागा प्रदर्शित केल्या जाणार आहेत,अशी माहिती राज्याचे माध्यमिक शिक्षण संचालक डॉ.महेश पालकर यांनी कळविले आहे. 

11 th Admission: पहिल्या फेरीतून 6 लाख 32 हजार 194 विद्यार्थ्यांना प्रवेश

शिक्षण विभागातर्फे 27 जून रोजी इयत्ता अकरावी प्रवेशाची गुणवत्ता यादी प्रसिद्ध केली जाणार होती. परंतु काही तांत्रिक अडचणी आल्यामुळे ही गुणवत्ता यादी जाहीर करणे शक्य झाले नाही. मात्र, 28 जून रोजी पुन्हा एकदा शिक्षण विभागाने अकरावी प्रवेश प्रक्रिया संदर्भात नवीन परिपत्रक प्रसिद्ध केले. त्यानुसार 28 जून रोजी सायंकाळी पाच वाजताच विद्यार्थ्यांची गुणवत्ता यादी जाहीर केली जाणार असल्याचे स्पष्ट करण्यात आले आहे.

विद्यार्थी या लिंकवर https://mahafyjcadmissions.in जाऊन गुणवत्ता यादी पाहू शकतात. तसेच 8530955564 या हेल्पलाइन क्रमांकावर माहितीसाठी संपर्क साधून  शकतात, असेही परिपत्रकात स्पष्ट करण्यात आले आहे. 

अकरावी प्रवेशासाठी राज्यातील ९ हजार ४३५ कनिष्ठ महाविद्यालयांमध्ये २१ लाख २३ हजार ४०  जागा उपलब्ध आहेत. मात्र, प्रवेशासाठी १२ लाख ७१ हजार २०१ विद्यार्थ्यांनीच अर्ज केले आहेत. त्यापैकी संस्था निहाय कोटा आणि अल्पसंख्यांक कोटा यासाठी ६० हजार ४८७ विद्यार्थ्यांचे प्रवेश निश्चित झाले आहे. त्यामुळे आता २० लाखांपेक्षा अधिक जागांसाठी उर्वरित १२ लाख विद्यार्थ्यांचे या निवड यादीकडे लक्ष लागले आहे.