शिक्षक भरती : गणित विषयाच्या जागा रिक्ताच राहणार ; इतर विषयाच्या जागांचे काय होणार ?

एज्युवार्ता न्यूज नेटवर्क 

शालेय शिक्षण विभागातर्फे राज्यातील शाळांमधील शिक्षकांच्या रिक्त जागांवर लवकरच भरती (Recruitment to the vacancies of teachers)केली जाणार आहे. त्यात बहुतांश गणित विषयाच्या शिक्षकांच्या जागा रिक्त (Vacancies for Mathematics subject teachers) आहेत. मात्र, राज्यात गणित विषयातील टीईटी परीक्षा उत्तीर्ण (पेपर -2) (Passed TET Exam in Mathematics) शिक्षकांची संख्या खूपच कमी आहे. परिणामी भरती प्रक्रिया राबवूनही शिक्षकांच्या हजारो जागा रिक्त राहणार असल्याचे तज्ज्ञ व्यक्तीकडून सांगितले जात आहे. त्यामुळे शाळांना शिक्षक मिळावेत यासाठी प्रथमत: गणित विषयातील टीईटी उत्तीर्ण उमेदवारांची संख्या वाढवावी लागणार आहे.

केंद्र शासनाने शिक्षक पदासाठी टीईटी परीक्षा उतीर्ण असण्याची अट घातली. त्यातही गणित विषय शिकवणाऱ्या शिक्षकांसाठी गणित विषय घेऊन टीईटी उत्तीर्ण होण्याचे बंधन घातले. मात्र,  महाराष्ट्र राज्य परीक्षा परिषदेकडून प्राप्त झालेल्या आकडेवारीनुसार 2018 मध्ये गणित व विज्ञान विषयासह टीईटी परीक्षा केवळ 811 उमेदवार उत्तीर्ण झाले होते. 2019 मध्ये 289 तर 2021 मध्ये 937 उमेदवार गणित व विज्ञान विषयासह टीईटी परीक्षा उत्तीर्ण झाले. त्यामुळे तीन वर्षात केवळ 2 हजार 37 उमेदवार उत्तीर्ण झाले आहेत. राज्यातील गणित विषयातील रिक्त जागांचा विचार करता टीईटी उत्तीर्ण उमेदवारांची संख्या खूप कमी आहे.

हेही वाचा : CUET PG : कॉमन युनिव्हर्सिटी एंट्रन्स टेस्ट प्रक्रियेला सुरूवात

सायन्स विषयातील शिक्षकांची संख्या कमी असली तरी सोशल सायन्सच्या उमेदवारांची संख्या मोठी आहे. 2018 मध्ये  सोशल सायन्सच्या विषयासह टीईटी परीक्षेत 4 हजार 681 उमेदवार उत्तीर्ण झाले होते. 2019 मध्ये 9 हजार 854  तर 2021 मध्ये 6 हजार 711 उमेदवार उत्तीर्ण झाले होते.2018 पूर्वी उत्तीर्ण झालेल्या टीईटी  परीक्षांमध्ये सुध्दा हजारो उमेदवार सोशल सायन्ससह टीईटी उत्तीर्ण झाले आहेत.त्यामुळे शिक्षक भरतीत खरी स्पर्धा सोशल सायन्स विषयातील शिक्षकांमध्ये असणार आहे.
-------------------

बीएड अभ्यासक्रमास प्रवेश घेणाऱ्या विद्यार्थ्यांची संख्या सुमारे 30 ते 32 हजार असली तरी त्यात सोशल सायन्सच्या विद्यार्थ्यांची संख्या अधिक आहे. 2020-21 मध्ये 29 हजार 533 विद्यार्थ्यांनी 2021-22 मध्ये 32 हजार 374 तर  2022-23 या शैक्षणिक वर्षात 32 हजार 315 विद्यार्थ्यांनी बीएड अभ्यासक्रमास प्रवेश घेतला होता.इयत्ता सहावीपासून पुढे बीएड पदवी धारक विद्यार्थ्यांना शिकवतात.त्यामूळे गणित विषयाला शिक्षक कोठून आणणार असा प्रश्न उपस्थित होत आहे.

-----------------------------

रोष्टर तपासणी केल्यानंतर त्या-त्या संवर्गानुसार त्या- त्या विषयाचा उमेदवार अनेकवेळा मिळत नाही.परिणामी पदे रिक्त राहतात.त्यामुळे गणित विषयाच्या शिक्षकांची पदे रिक्त राहण्याची शक्यता नाकारता येत नाही. 
- महेंद्र गणपुले, प्रवक्ता, मुख्याध्यापक संघ 
---------------------------------