SPPU परीक्षा विभागाचा गोंधळ; अर्जाची मुदत संपण्यापूर्वीच परीक्षा केल्या सुरू,आता वेळापत्रक रद्द

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या (Savitribai Phule Pune University)परीक्षा विभागाने (examination department)एलएलएम अभ्यासक्रमाच्या विद्यार्थ्यांच्या परीक्षेच्या वेळापत्रकात (Examination schedule for LLM course students) गोंधळ घातल्याची माहिती समोर आली आहे. परीक्षा विभागाने एलएलएमच्या विद्यार्थ्यांना परीक्षा अर्ज भरण्यासाठी येत्या ३० नोव्हेंबर पर्यंत मुदत दिली. मात्र, या विद्यार्थ्यांच्या परीक्षा २२ नोव्हेंबर पासून सुरू होणार असल्याचे वेळापत्रक जाहीर केले. त्यामुळे विद्यार्थ्यांमध्ये गोंधळाचे वातावरण निर्माण झाले.परंतु, ही चूक परीक्षा विभागाच्या लक्षात आल्यानंतर त्यात दुरुस्ती करणारे जाहीर प्रकटन परीक्षा विभागाने प्रसिद्ध केले आहे.

परीक्षा विभागाने प्रकटन प्रसिध्द केले असून त्यानुसार  शैक्षणिक वर्ष २०२५-२०२६ मध्ये प्रवेशित एल.एल.एम. प्रथम सत्रातील सर्व विद्यार्थ्यांना परीक्षा अर्ज भरण्यास ३० नोव्हेंबरपर्यंत मुदत देण्यात आली.परीक्षा अर्ज भरणाऱ्या विद्यार्थ्यांच्या परीक्षा या येत्या डिसेंबर २०२५ मध्ये पहिल्या आठवड्यात आयोजीत करण्यात येणार आहेत. त्यामुळे २२ नोव्हेंबर २०२५ पासून प्रथम सत्राच्या परीक्षा सुरु करण्यात असल्याबाबतचे परीक्षा वेळापत्रक रद्द करण्यात आले आहे. एल.एल.एम. प्रथम सत्र परीक्षा २०२५ चे सुधारित वेळापत्रक लवकरच प्रसिद्ध केले जाणार आहे. असे असले तरी येत्या २२ नोव्हेंबर २०२५ पासून द्वितीय वर्ष एल.एल.एम.च्या सर्व परीक्षा या जाहीर केलेल्या नियमित परीक्षा वेळापत्रकानुसारच होतील, याची विद्यार्थ्यांनी नोंद घ्यावी,असे परीक्षा विभागाने प्रसिद्ध केलेल्या प्रकाटणात नमूद करण्यात आले आहे. 

परीक्षा अर्ज भरण्याची मुदत संपण्यापूर्वीच विद्यापीठाच्या परीक्षा विभागाने विद्यार्थ्यांची परीक्षा घेण्याची तयारी सुरू केली होती.तसेच त्याबाबतचे वेळापत्रकही प्रसिद्ध केले होते. आता विद्यापीठाने प्रसिध्द केलेले वेळापत्रक रद्द केले आहे. एकीकडे अर्ज भरण्याची मुदत बाकी असताना परीक्षा घेण्याची घाई केली जाते. मात्र, गेल्या अनेक दिवसांपासून परीक्षेच्या प्रतीक्षेत असलेल्या पीआरएन ब्लॉक विद्यार्थ्यांच्या परीक्षेबाबात विद्यापीठाकडून निर्णय घेण्यास विलंब केला जातो, त्यामुळे विद्यार्थ्यांमध्ये नाराजीचे वातावरण आहे.