अमेरिकेत भारतीय विद्यार्थ्यांच्या मृत्यूचे सत्र सुरूच; महिन्यापासून बेपत्ता असलेल्या अब्दुलचा मृतदेह सापडला 

एज्युवार्ता न्यूज नेटवर्क 

भारतीय विद्यार्थी अमेरिकेत सुरक्षित नसल्याचे वातावरण आहे. कारण अमेरिकेत भारतीय विद्यार्थ्यांच्या मृत्यूची( Indian students, death,America)प्रकरणे सातत्याने समोर येत आहेत. आता आणखी एका भारतीय विद्यार्थ्याचा मृतदेह सापडला आहे. गेल्या महिन्यापासून बेपत्ता असलेला २५ वर्षीय भारतीय विद्यार्थी अमेरिकेतील क्लीव्हलँड शहरात मृतावस्थेत आढळून आला आहे. आठवडाभरात अमेरिकेत भारतीय विद्यार्थ्याच्या मृत्यूची ही दुसरी घटना आहे. हैदराबाद येथील नचाराम येथे राहणारा मोहम्मद अब्दुल अराफत गेल्या वर्षी मे महिन्यात क्लीव्हलँड विद्यापीठातून आयटी विषयात पदव्युत्तर पदवी घेण्यासाठी अमेरिकेत आला होता.

अराफतचे वडील मोहम्मद सलीम यांनी प्रसार माध्यमांशी बोलताना सांगितले होते की, "अराफतने त्यांच्याशी 7 मार्च रोजी शेवटचा संपर्क साधला होता. त्यानंतर त्याचा मोबाईलही बंद असल्याचे त्यांनी सांगितले. अराफतच्या अमेरिकेतील रूममेटने त्याच्या वडिलांना क्लीव्हलँड पोलिसांकडे बेपत्ता झाल्याची तक्रार दाखल केल्याची माहिती दिली होती.

दरम्यान, 19 मार्च रोजी, अराफातच्या कुटुंबाला एका अज्ञात व्यक्तीचा फोन आला ज्याने असा दावा केला होता की अराफातचे अपहरण करण्यात आले आहे. त्याने आराफत च्या मुक्तीसाठी US$ 1,200" ची मागणी केली होती. खंडणी न दिल्यास कॉलरने अराफतची किडनी विकण्याची धमकीही दिली होती, असे त्याच्या वडिलांनी सांगितले.

विशेष म्हणजे या वर्षाच्या सुरुवातीपासून अमेरिकेत भारतीय विद्यार्थ्यांसोबत अनुचित प्रकार घडल्याच्या अर्धा डझनहून अधिक घटना समोर आल्या आहेत. याआधी जॉर्जियामध्ये 25 वर्षीय विवेक सैनीची एका ड्रग्जच्या व्यसनी व्यक्तीने हत्या केली होती. 19 वर्षीय श्रेयस रेड्डी बेनिगर हा ओहायोमध्ये मृतावस्थेत आढळला. याशिवाय नील आचार्य पर्ड्यू विद्यापीठाच्या परिसरात मृतावस्थेत आढळून आले. भारतीय वंशाच्या अकुल धवनचा मृतदेह इलिनॉय विद्यापीठाबाहेर सापडला होता.