पेट, एलएलएम परीक्षेत गोंधळ; कुलगुरूंकडे परीक्षा नियंत्रकांच्या राजीनाम्याची मागणी 

एज्युवार्ता न्यूज नेटवर्क 

दोन दिवसांपुर्वी मुंबई विद्यापीठाची (Mumbai University) पीएच. डी. प्रवेश परीक्षा (पेट) (Ph. D. Entrance Examination PET) आणि एलएलएम प्रवेश पूर्व परीक्षा (LLM Pre-Entrance Examination) पार पडली. मात्र, या परीक्षेवेळी काही परीक्षा केंद्रांवर गोंधळ झाला. त्यानंतर उच्चस्तरीय चौकशी स्थापन करून दोषींवर कारवाई करावी,या मागणीचे पत्र युवासेनेचे सिनेट सदस्य प्रदीप सावंत यांनी कुलगुरूंना दिले आहे. 

मुंबई विद्यापीठाने रविवारी सकाळी १०:३० ते दुपारी १२:३० या वेळेत पेट तर दुपारी ३:०० ते ४:०० या वेळेत एलएलएम प्रवेशपूर्व परीक्षा ऑनलाइन पद्धतीने ठेवली होती. मात्र, पेट व एलएलएम प्रवेश परीक्षेत ठाकूर महाविद्यालय, कांदिवली येथे परीक्षेच्या नियमित वेळेनंतर तब्बल तीन तास उशिरा सुरू झाली. परंतु, त्यामध्ये देखील अनेक त्रुटी जाणवल्या. शेजारी बसलेल्या दोन विद्यार्थ्यांना समान प्रश्नपत्रिका, मास कॉपी असे गैरप्रकार निदर्शनास आल्याच्या तक्रारी विद्याथ्यर्थ्यांकडून प्राप्त झाल्या आहेत, असा पत्रात नमूद करण्यात आले आहे. 

डोंबिवली येथे सुरेखा इन्फोटेक या केंद्रावर परीक्षाच झाल्या नाहीत. सदर परीक्षा पुढील रविवारी होणार असल्याच्या तक्रारी विद्यार्थ्यांकडून करण्यात आल्या आहेत. वास्तविक पेट परीक्षा पूर्वी एका शैक्षणिक वर्षात दोन वेळा घेण्यात येत असे, परंतु, आता झालेली परीक्षा तब्बल दोन वर्षाने घेण्यात आली. त्यामध्येही अशा गोंधळामुळे विद्यार्थी हवालदिल झाले आहेत.

विद्यार्थ्यांच्या सोयी सुविधा करिता युवासेनेच्या वतीने तीव्र आंदोलन उडण्यात येईल आणि परीक्षा भवन आणि आयडॉल विभागाला टाळे ठोकण्याचा इशारा देण्यात आला आहे. पुढील रविवारी होणार्‍या परीक्षा सुरळीत घेण्यात याव्यात आणि कालच्या रविवारी झालेल्या परीक्षेच्या गोंधळाला परीक्षा नियंत्रक यांना जबाबदार धरून त्यांचा राजीनामा घ्यावा, अशी आग्रही मागणी युवासेनेच्या पत्रातून करण्यात आली आहे.