डी.वाय.पाटील,इंदिरा,जेएसपीएम, झील,कमिन्स कॉलेजला दणका; तंत्र शिक्षण विभागाने मागितला प्रवेशाचा खुलासा 

एज्युवार्ता न्यूज नेटवर्क 

पुणे इन्स्टिट्यूट ऑफ कम्प्युटर टेक्नॉलॉजी (पीआयसीटी) Pune Institute of Computer Technology - PICT या संस्थेविरोधात कारवाई केल्यानंतर पुणे विभागीय तंत्र शिक्षण संचालक कार्यालयाने (Joint Director of Technical Education) पुण्यातील बहुतांश सर्व नामांकित शैक्षणिक संस्थांकडून संस्था स्तरावरील प्रवेश (Institutional level admission) प्रक्रियेचा खुलासा मागविला आहे. तसेच संस्था स्तरावर राबविण्यात आलेले प्रवेश नियमबाह्य पद्धतीने केल्याचे सिद्ध झाल्यास असे प्रवेश रद्द केले जाणार असल्याचे परिपत्रकाद्वारे स्पष्ट केले आहे. त्यामुळे तंत्र शिक्षण विभाग आता ॲक्शन मोडवर आल्याचे दिसून येत आहे.दरम्यान, याबाबत युवासेनेचे सहसचिव कल्पेश यादव (Yuvasene Joint Secretary Kalpesh Yadav)यांनी तंत्र शिक्षण विभागाने प्रसिध्द केलेले पत्र 'एक्स' या आपल्या सोशल मीडियावर प्रसिद्ध केले आहे. 

महाराष्ट्र विनाअनुदानित खाजगी व्यावसायिक शैक्षणिक संस्था नियम 2017 च्या पोटनियम 13 नुसार संस्था स्तरावरील प्रवेश प्रक्रिया कशी राबवावी याचे स्पष्ट निर्देश देण्यात आले आहे. संस्था स्तरीय कोट्यातील जागा, अल्पसंख्यांक कोट्यातील जागा आणि केंद्रभूत प्रवेश प्रक्रियेनंतर रिक्त राहिलेल्या जागांवर प्रवेश  विनाअनुदानित संस्थेतील संचालक किंवा प्राचार्य यांनी प्रवेश प्रक्रिया कशी राबवावी याची निश्चित पद्धती सीईटी सेलने प्रसिद्ध केली आहे. त्याचप्रमाणे या नियमांची काटेकोर अंमलबजावणी करणे आवश्यक असल्याचे सर्व संस्थांना कळविण्यात आले आहे.

दरम्यान, राज्य सामायिक प्रवेश परीक्षा कक्षाकडे युवासेनेचे सहसचिव कल्पेश यादव यांनी पुण्यातील नामांकित शैक्षणिक संस्थांमध्ये नियमांचे उल्लंघन करून संस्था स्तरावरील प्रवेश प्रक्रिया राबवली जात असल्याची तक्रार केली होती. त्यावर पुणे विभागीय तंत्र शिक्षण प्र.सहसंचालक एम.आर.जाधव यांनी परिपत्रक प्रसिद्ध केले असून तक्रारीनुसार संबंधित संस्थेने तात्काळ खुलासा सादर करावा,असे आदेश दिले आहेत.कल्पेश यादव यांनी दिलेल्या तक्रारीनंतर पीआयसीटीचे प्रवेश रद्द करण्यात आले होते.

------------------------------------

व्यावसायिक अभ्यासक्रमाच्या प्रवेशासाठी राज्य सामायिक प्रवेश परीक्षा कक्षाने सविस्तर नियमावली दिली आहे.मात्र, पुण्यातील काही नामांकित शैक्षणिक संस्था या नियमांचे उल्लंघन करत प्रवेश प्रक्रिया राबवत असल्याचे दिसून आले आहे. त्यावर सीईटी सेलचे आयुक्त आणि तंत्रशिक्षण विभाग विभागाचे संचालक यांच्याकडे निवेदन देण्यात आले होते. निवेदनाची दखल घेऊन पीआयसीटी या शैक्षणिक संस्थेवर कारवाई करत संस्थेने केलेले नियमबाह्य प्रवेश तंत्रशिक्षण विभागाने रद्द केले. केवळ पीआयसीटीच नाही तर पुण्यातील नामांकित शैक्षणिक संस्थांची यादीच राज्य सामायिक प्रवेश परीक्षा कक्ष व तंत्र शिक्षण विभागाकडे देण्यात आली होती.त्यावर तंत्रशिक्षण संचालक कार्यालयाने परिपत्रक काढून संबंधित शैक्षणिक संस्थांकडून संस्था स्तरावरील राबविण्यात आलेल्या प्रवेश प्रक्रियेचा खुलासा मागविला आहे. तसेच या संस्थांनी नियमबाह्य प्रवेश केले असल्यास ते प्रवेश रद्द केले जाणार असल्याचे स्पष्टपणे कळविले आहे, असे युवासेनेचे सहसचिव कल्पेश यादव यांनी आपल्या 'एक्स' या सोशल मीडिया हँडलवर प्रसिध्द केले आहे. 

------------------------------

तंत्र शिक्षण विभागाने प्रसिद्ध केलेल्या परिपत्रकात खालील शैक्षणिक संस्थांची नावे आहेत. 

डी.वाय.पाटील कॉलेज ऑफ इंजीनियरिंग, आकुर्डी 
डी.वाय.पाटील  इन्स्टिट्यूट ऑफ इंजीनिअरिंग अँड मॅनेजमेंट रिसर्च, आकुर्डी 
डी.वाय.पाटील  इन्स्टिट्यूट ऑफ टेक्नॉलॉजी,पिंपरी 
अजिंक्य डी.वाय.पाटील स्कूल ऑफ इंजीनिअरिंग अँड मॅनेजमेंट, लोहगाव 
कमिन्स कॉलेज ऑफ इंजीनिअरिंग, कर्वेनगर 
इंदिरा कॉलेज ऑफ इंजीनियरिंग अँड मॅनेजमेंट, पुणे
पुणे विद्यार्थी गृहाचे कॉलेज ऑफ इंजीनियरिंग अँड टेक्नॉलॉजी, पुणे 
प्रोग्रेसिव्ह एज्युकेशन सोसायटीचे मॉर्डन कॉलेज ऑफ इंजीनिअरिंग , पुणे 
जेएसपीएम राजश्री शाहू कॉलेज ऑफ इंजीनिअरिंग  अँड मॅनेजमेंट, ताथवडे 
मराठवाडा मित्र मंडळाचे कॉलेज ऑफ इंजीनिअरिंग , कर्वेनगर 
मराठवाडा मित्र मंडळाचे इन्स्टिट्यूट ऑफ टेक्नॉलॉजी, लोहगाव 
झील कॉलेज ऑफ इंजीनिअरिंग अँड रिसर्च, न-हे 
ढोले पाटील कॉलेज ऑफ इंजीनिअरिंग , वाघोली 
गेनबा सोपानराव मोझे कॉलेज ऑफ इंजीनिअरिंग , वाघोली 
गेनबा सोपानराव मोजे कॉलेज ऑफ इंजीनिअरिंग , बालेवाडी