नांदेड हादरले! शिक्षकानेच केली पोटच्या २ मुलांची हत्या; पोस्टमॉर्टेममधून धक्कादायक खुलासा

एज्युवार्ता न्यूज नेटवर्क 

नांदेड जिल्ह्यातील पुनेगाव येथे जिल्हा परिषद शाळेतील शिक्षकाने (ZP school teacher) आपल्या दोन चिमुकल्या मुलांना चाकूने भोसकून ठार मारल्यानंतर (Children murdered with a knife) कार गोदावरी नदीत टाकून आत्महत्या केल्याची धक्कादायक घटना समोर आली आहे. शुक्रवारी सकाळी घडलेल्या या प्रकाराने संपूर्ण राज्यभरात खळबळ उडाली. सुरुवातीला ही घटना आत्महत्या असल्याचे मानले जात होते, मात्र पोस्टमॉर्टेम अहवालाने (Post-mortem report) प्रकरणाला भयावह वळण दिले आहे. हिमायतनगर तालुक्यातील पोटा येथील जिल्हा परिषद शाळेत कार्यरत सुनील मोरे यांनी आपल्या मुलांची हत्या केल्यानंतर स्वतः आत्महत्या (Committed suicide after killing the children) केल्याचे तपासातून स्पष्ट झाले.

सुनील मोरे आणि त्यांची पत्नी धम्मशिला मोरे हे दोघेही पोटा जिल्हा परिषद शाळेत शिक्षक होते. त्यांना सारा (१४) आणि सुमित (१०) अशी दोन मुले होती. गुरुवारी सायंकाळी सुनील मोरे मुलांना खासगी क्लासला सोडण्याच्या बहाण्याने घरीतून बाहेर पडले. मात्र त्यांनी मुलांना क्लासला न नेता अज्ञात ठिकाणी नेले. मुले घरी परतली नसल्याने धम्मशिला यांनी फोन केला असता सुनील यांनी “माझ्यासोबत मुले नाहीत” असे सांगितले. दुसऱ्या दिवशी सकाळी साडेआठच्या सुमारास पुनेगाव पुलावरून सुनील यांची कार सुमारे ५० फूट खोल गोदावरी नदीत कोसळली.

पोलिसांच्या तपासात आणि पोस्टमॉर्टेम अहवालातून भयावह वस्तुस्थिती समोर आली. आत्महत्येपूर्वी सुनील मोरे यांनी दोन्ही मुलांच्या छातीत आणि पोटात चाकूने वार करून त्यांची हत्या केली होती. ही हत्या मुलं झोपेत असताना किंवा कारमध्येच झाली असावी, असा प्राथमिक अंदाज आहे. घटनेपूर्वी सुनील यांनी व्हॉट्सॲप स्टेटसवर “मी माझ्या मुलांना संपवून आत्महत्या करत आहे” असा संदेश ठेवला होता. त्यात हदगावचे गट शिक्षण अधिकारी किशन फोले, विस्तार अधिकारी सूर्यकांत बाच्चे, केंद्र प्रमुख शिवाजी कदम आणि दत्ता विश्वभर पवळे यांच्यावर आरोप केले होते.

धम्मशिला मोरे यांनी पती आणि मुलं बेपत्ता झाल्याची विमानतळ पोलिस ठाण्यात तक्रार दिली होती. सुनील यांनी एका सहकाऱ्यालाही आत्महत्या करत असल्याची माहिती दिली होती. ग्रामीण पोलिस ठाण्यात सुनील मोरे यांच्याविरोधात खुनाचा गुन्हा दाखल करण्यात आला असून, संबंधित शिक्षण विभागातील चार अधिकाऱ्यांविरोधातही गुन्हा नोंदवला आहे. या प्रकरणाचा सखोल तपास पोलिस करत आहेत. ही घटना राज्यातील शिक्षण क्षेत्रातील कामाच्या ताण आणि वैयक्तिक समस्यांमुळे उद्भवलेल्या मानसिक दबावाकडे लक्ष वेधणारी ठरली आहे.