तलाठी भरती 2023 : पात्र उमेदवारांना कागदपत्र तपासणीसाठी हजर राहण्याच्या सूचना

एज्युवार्ता न्यूज नेटवर्क 

राज्यात ४ हजार ४६६ जागांसाठी  तलाठी भरतीची (Talathi Bharti) प्रक्रिया पार पडली. रिक्त पदांसाठी १७ ऑगस्ट ते १४ सप्टेंबर २०२३ या कालावधीत ऑनलाईन परीक्षा घेण्यात आली. सदर परीक्षेचा निकाल ऑनलाईन पध्दतीने प्रसिद्ध करण्यात आला. तसेच गुणवत्तेच्या आधारावर प्रवर्ग निहाय निवड यादी व प्रतिक्षा यादी १४ मार्च रोजी प्रसिद्ध करण्यात आली. आता निवड यादीत स्थान देण्यात आलेल्या उमेदवारांना कागदपत्र तपासणीकरीता (Document verification of candidates) जिल्हाधिकारी कार्यालयात हजर राहाण्याचे इमेल जिल्हा निवड समितीकडून (District Selection Committee) पाठवण्यात आले आहेत. 

सदर निवड/प्रतिक्षा यादी ही उमेदवारांचे मूळ कागदपत्रांची तपासणी तसेच इतर अटी व शर्तींच्या अधिन राहुन प्रसिद्ध करण्यात आलेली आहे. निवड/ प्रतिक्षा यादीतील उमेदवारांनी दिलेल्या वेळेत मुळ कागदपत्रांच्या तपासणीकरीता दिनांक ६ आणि ७ मे रोजी सकाळी १०:३० ते ५:३० या वेळेत जिल्हाधिकारी कार्यालयात मुळ कागदपत्रे व मुळ कागदपत्राच्या प्रत्येकी दोन छायांकित प्रतीसह न चुकता उपस्थित राहावे, असे इमेल मध्ये नमुद करण्यात आले आहे.  

तसेच आपण जर सदर पदाकरीत उच्छुक नसल्यास तसे या कार्यालयास लेखी कळविण्यात येवे, जेणे करुन प्रतिक्षा यादीतील अन्य उमेदवारांना संधी मिळू शकेल, असे देखील त्यात स्पष्ट करण्यात आले आहे.

राज्यात जून २०२३ मध्ये ४ हजार ४६६ जागांसाठी आठ लाख ६४ हजार ९६० उमेदवारांनी परीक्षा दिली होती. त्यातील १९ जिल्ह्यांतील एक हजार ४४ उमेदवारांना नियुक्ती आदेश देण्यात आले आहेत, मात्र, बाकीच्या जिल्ह्यातील ३ हजार ४०० तलाठ्यांना अद्यापही नियुक्ती आदेश दिले गेले नाहीत. त्यामुळे हे सर्व उमेदवार प्रतीक्षेत आहेत.