UPSC ची तयारी करणाऱ्या महाराष्ट्रातील तरुणीची दिल्लीत आत्महत्या; सुसाईड नोटमध्ये गंभीर आरोप
काही दिवसांपुर्वी राव आयएएस कोचिंग सेंटरच्या तळघरात बुडून तीन विद्यार्थ्यांच्या मृत्यूमुळे संपूर्ण देश हादरला होता. या प्रकरणामुळे अंजलीने लिहिलेल्या सुसाईट नोटला महत्त्व प्राप्त झाले आहे.
eduvarta@gmail.com 
एज्युवार्ता न्यूज नेटवर्क
काही दिवसांपुर्वी अकोल्याच्या अंजली गोपनारायण (Anjali Gopnarayan) या तरुणीने दिल्लीतील राजेंद्रनगर येथील हाॅस्टेलमध्येच (Student commits suicide in hostel) आपले आयुष्य संपविले. या विद्यार्थिनीने आत्महत्या करून काही दिवस उकटले असून हे प्रकरण प्रसारमाध्यमांमध्ये फारसे आले नव्हते. मात्र, आता तिने लिहिलेली एक सुसाईड नोट समोर (Suicide note found) आली आहे. त्या नोटमध्ये पीजी आणि हाॅस्टेल मालकांवर तिने गंभीर आरोप केले आहेत. काही दिवसांपुर्वी राव आयएएस कोचिंग सेंटरच्या (Rao IAS Coaching Centre) तळघरात बुडून तीन विद्यार्थ्यांच्या मृत्यूमुळे संपूर्ण देश हादरला होता. या प्रकरणामुळे अंजलीने लिहिलेल्या सुसाईट नोटला महत्त्व प्राप्त झाले आहे.
तिच्या सुसाईड नोटमध्ये अंजलीने लिहिले आहे की, आम्ही जिथे राहतो तिथे पीजी आणि हॉस्टेल मालक विद्यार्थ्यांची लूट करत आहेत. पीजी आणि हॉस्टेलच्या भाड्यावर नियंत्रण असायला हवे. सर्व विद्यार्थ्यांकडे इच्छित भाडे भरण्यासाठी पुरेसे पैसे नसतात. विद्यार्थ्यानीने पुढे लिहिले की, कोणालाही रडण्याची गरज नाही. प्रत्येकाला एक ना एक दिवस मरावेच लागते.
अंजलीने लिहिले आहे की, आई बाबा मता माफ करा, आत्महत्या हा कोणत्याही समस्येवरचा उपाय नसून मला शांतता हवी आहे, म्हणूनच मी हे पाऊल उचलले आहे. मला खूप असहाय्य वाटत आहे. तिच्या तीन पानी सुसाईड नोटमध्ये अंजलीने यूपीएससी परीक्षेतील हेराफेरी थांबवण्याचे आवाहन सरकारला केले आहे. विद्यार्थी परीक्षेची खूप मेहनत घेतात, अशा परिस्थितीत त्यांचे मनोबल खचून जाते. तरुणांसाठी रोजगाराच्या संधी निर्माण झाल्या पाहिजेत. तिने लिहिले की, हे माझे जीवन आहे आणि मला हवे ते करण्याचा अधिकार आहे, त्यामुळे त्याची बातमी बनवू नये.
महाराष्ट्रातील अकोला जिल्ह्यातील रहिवाशी असलेली अंजली गोपनारायण ही तरुणी दिल्लीला युपीएससीचा अभ्यास करण्यासाठी गेली होती. तिचे स्वप्न होते की ती पहिल्याच प्रयत्नात यूपीएससीची परीक्षा उत्तीर्ण होईल, पण तसे होऊ शकले नाही. अपयश आल्याने व खर्च वाढत चालल्याने नैराश्यातून अंजलीने हॉस्टेलमध्येच आत्महत्या केली.
