बार्टी , सारथी व महाज्योती फेलोशिप परीक्षेची तयारी पूर्ण ; पण विद्यार्थ्यांनी घातला बहिष्कार

एज्युवार्ता न्यूज नेटवर्क 

बार्टी , सारथी व महाज्योती (barti,sarthi ,Mahajyoti) या संस्थांच्या माध्यमातून दिल्या जाणाऱ्या फेलोशिपसाठी येत्या 10 जानेवारी रोजी फेलोशिप चाचणी परीक्षा (Fellowship Test Examination) घेतली जाणार असून सावित्रीबाई फुले पुणे विद्यापीठाच्या सेट  विभागाने (Set Exam Department of Savitribai Phule Pune University) परीक्षेची पूर्ण तयारी केली आहे. राज्यातील 4 प्रमुख शहरात ही परीक्षा होणार असून 3 हजार 475 विद्यार्थ्यांची परीक्षा घेण्यात येणार आहे. परीक्षा देणाऱ्या विद्यार्थ्यांमध्ये महाज्योती संस्थेचे सर्वाधिक विद्यार्थी आहेत.मात्र, बार्टी संशोधक विद्यार्थी संघर्ष कृती समितीने परीक्षेवर बहिष्कार घालण्याचे आवाहन केले आहे.त्यामुळे किती विद्यार्थी परीक्षा देणार हे पहाणे उत्सुकतेचे होणार आहे.

सावित्रीबाई फुले पुणे विद्यापीठाच्या सेट विभागातर्फे 24 डिसेंबर रोजी भारतीय सारखी व महाज्योती संस्थेच्या फेलोशिप साठी परीक्षा घेण्यात आली. परंतु या परीक्षेत 2019 चा सेट परीक्षेचा पेपर जसाचा तसा वापरला गेला.त्यामुळे विद्यार्थ्यांनी आक्षेप घेतला.परिणामी ही परीक्षा रद्द करण्यात आली. आता येत्या दहा जानेवारी रोजी पुणे, कोल्हापूर, औरंगाबाद व नागपूर या चार शहरांमध्ये ही परीक्षा होणार आहे. पुणे शहरात दोन परीक्षा केंद्र असणार आहेत तर उर्वरित ठिकाणी प्रत्येकी एक परीक्षा केंद्र देण्यात आले आहे.

हेही वाचा : डॉ.बाबासाहेब आंबेडकर मराठवाडा विद्यापीठाच्या कुलगुरूंचे नाव निश्चित ; यांच्या गळयात पडणार कुलगुरू पदाची माळ

सेट विभागाचे समन्वयक बाळासाहेब कापडणीस म्हणाले 10 जानेवारी रोजी सकाळी दहा ते अकरा या वेळेत एक तासाचा फेलोशिप चाचणी (सीईटी) परीक्षेचे  नियोजन करण्यात आले आहे. परीक्षेसाठी 50 प्रश्न विचारले जाणार असून प्रत्येक प्रश्न दोन गुणांसाठी अशी शंभर गुणांची परीक्षा असेल. परीक्षेसाठी नोंदणी केलेल्या विद्यार्थ्यांमध्ये बार्टीचे 763 विद्यार्थी सारखेच 1हजार 329 विद्यार्थी तर महाजोतीचे 1 हजार 383 विद्यार्थी आहेत. परीक्षेनंतर संस्था निहाय विद्यार्थ्यांची गुणवत्ता यादी जाहीर करून संबंधित संस्थेकडे दिले जाणार आहे.

----------------

बार्टीचे महासंचालक यांनी सीईटी परीक्षा रद्द झाल्याचे जाहीर केले त्याचे लेखी पत्रक विद्यार्थी तसेच बार्टीचे अधिकृत वेबसाईट वर ही जाहीर केले मात्र 2 जानेवारी 2024 रोजी सायंकाळी बार्टीने वेबसाईड वरील परीक्षा रद्दचे पत्रक काढून सीईटी परीक्षा ठरलेल्या तारखेस10 जानेवारीस  होणार असल्याचे पत्रक जारी करत विद्यार्थ्यांची दिशाभूल केली आहे.त्यामुळे आम्ही परीक्षेवर बहिष्कार घालणार आहोत.सोमवारी दुपारी याबाबत पत्रकार परिषद सुध्दा घेतली जाणार आहे.

- प्रवीण गायकवाड, बार्टी संशोधक विद्यार्थी संघर्ष कृती समिती २०२२