'TAIT-३'च्या वेळापत्रकात बदल करण्याची विद्यार्थ्यांची पुन्हा एकदा मागणी

एज्युवार्ता न्यूज नेटवर्क

शिक्षक अभियोग्यता व बुद्धिमत्ता चाचणी (TAIT-3) परीक्षेबाबत युवा विद्यार्थी असोसिएशन महाराष्ट्र (Youth students Association Maharashtra) राज्याच्या वतीने पत्राद्वारे राज्य परीक्षा परिषदेकडे (State Examination Council) वेळापत्रकात बदल (Change in schedule) करण्याची मागणी करण्यात आली आहे. ही परीक्षा २७ ते ३० मे आणि २ ते ५ जून रोजी आयोजित करण्यात आली. मात्र, त्याच दरम्यान राज्यातील इतर महत्त्वाच्या शैक्षणिक आणि स्पर्धा परीक्षा असल्यामुळे विद्यार्थ्यांमध्ये संभ्रम व तणावाचे वातावरण निर्माण झाले आहे.

विद्यार्थ्यांनी निवेदनात नमूद केले आहे की, एमपीएससी गट-क, सेट, कृषी विद्यापीठ परीक्षा, मुक्त विद्यापीठ विज्ञान शाखेच्या परीक्षा याच दरम्यान होणार आहेत. त्यामुळे एकाच उमेदवाराला अनेक परीक्षांना सामोरे जाणे कठीण होणार आहे. जर कोणतीही परीक्षा एकाच दिवशी असेल, तर त्या परीक्षांचे प्रवेश पत्र २१ मे पर्यंत आयबीपीएस संस्थेला पाठविण्याचे आवाहन करण्यात आले होते; परंतु माहिती पाठवूनही एकाच दिवशी परीक्षा आल्या आहेत. त्यात दुरुस्ती करावी, अशी विद्यार्थ्यांची मागणी आहे. 

दरम्यान, यापूर्वी देखील ही परीक्षा पुढे ढकलण्यात यावी अशी मागणी विद्यार्थ्यांनी केल्यावर महाराष्ट्र राज्य परीक्षा परिषदेने या परीक्षेचे वेळापत्रक बदलले होते. आता पुन्हा एकदा या वेळापत्रकात बदल करून परीक्षा पुढे ढकलण्यात यावी अशी मागणी विद्यार्थ्यांकडून केली जात आहे. पूर्वी ही परीक्षा 24 मे ते 5 जून या दरम्यान आयोजित करण्यात आली होती त्यात बदल करून ही परीक्षा 27 ते 30 मे आणि दोन ते पाच जून रोजी आयोजित करण्यात आली आहे. 

_________________________

ज्या विद्यार्थ्यांच्या परीक्षा एकाच दिवशी आहे अशा सर्व विद्यार्थ्यांकडून २१ तारखेपर्यंत माहिती मागवली होती. ती माहिती संबंधित संस्थांना पाठवून त्यावेळेस व्यतिरिक्त पेपर देण्याचे आदेश दिले होते. २१ तारखेपर्यंत पाठविण्यात येणाऱ्या संकेतस्थळावर पूर्ण माहिती भरणे अपेक्षित होती. कोणत्याही विद्यार्थी परीक्षेपासून वंचित राहणार नाही, याची पूर्णपणे दक्षता घेतली आहे.

महेश पालकर, शिक्षण संचालक.