प्रजासत्ताक दिनाच्या दिवशी नामांकित शाळा बंद; विद्यार्थ्याचे नुकसान,पालकांचे आंदोलन 

एज्युवार्ता न्यूज नेटवर्क 

पुण्यातील नामांकित शाळा म्हणून ओळखल्या जाणाऱ्या सिंहगड स्प्रिंग डेल स्कूल मधील पालकांनी प्रजासत्ताक दिनाच्या दिवशीच शाळेसमोर आंदोलन केले. गेल्या काही दिवसांपासून शाळेतील विद्यार्थ्यांना शिकवले जात नाही. तसेच वर्गात आलेल्या विद्यार्थ्यांना ऑफ तासाला झोपायला सांगितले जाते. शाळा प्रशासन आर्थिक अडचणीत सापडल्यामुळे कर्मचाऱ्यांचे वेतन सुमारे दोन ते तीन वर्षांपासून दिले गेले नाही. त्यामुळे ऐन प्रजासत्ताक दिनाच्या दिवशी सुद्धा शाळा बंद राहिली. परिणामी विद्यार्थ्यांनी व पालकांनी शाळा परिसरात येऊन आंदोलन केले.

प्रजासत्ताक दिनी विद्यार्थ्यांनी भक्तीपर गीतांवर कवायत करावी, असे आदेश शालेय शिक्षण विभागाने दिले होते. त्याचे पालन सर्व शाळांनी करणे अपेक्षित होते. मात्र, पुण्यातील नामांकित शाळा म्हणून ओळखल्या जाणाऱ्या सिंहगड स्प्रिंग डेल शाळेमध्ये स्वातंत्र्य दिन विद्यार्थ्यांबरोबर साजराच होऊ शकला नाही. सायकल स्पर्धेमुळे पुढील काही दिवस शाळेने विद्यार्थ्यांना सुट्टी जाहीर केली होती. त्यामुळे आणखी किती दिवस शाळेला सुट्टी राहणार, याबाबत विद्यार्थी व पालकांमध्ये संभ्रम होता. शाळा बंद झाल्याने विद्यार्थ्यांच्या शैक्षणिक भवितव्याचा प्रश्न निर्माण झाला आहे. तसेच शाळा केव्हा सुरू होणार याबाबतही उत्तर मिळत नसल्याने विद्यार्थी व पालकांमध्ये गोंधळाचे वातावरण आहे.

शाळेत विद्यार्थ्यांना शिकवले जात नाही. गृहपाठ दिला जात नाही. नुकतेच उत्तीर्ण झालेले फ्रेशर शिक्षक म्हणून नियुक्त केले जात आहेत. पालकांकडून विद्यार्थ्यांच्या वाहतुकीसाठी दुपटीने शुल्क आकारले जाते. आम्ही सर्व पालकांनी शुल्क भरलेले आहे, त्यामुळे आमच्या विद्यार्थ्यांना शिकवायला हवे, आमच्या विद्यार्थ्यांचे नुकसान शाळेने करू नये, अशी भूमिका पालकांकडून मांडली जात आहे. 

दरम्यान सिंहगड इन्स्टिट्यूटचे डेंटल कॉलेज काही दिवसांपूर्वी बंद झाल्याचे वृत्त समोर आले होते. त्यानंतर आता स्प्रिंग डेल शाळा बंद होत असल्याचे निदर्शनास आले आहे.त्यामुळे सिंहगड ही शैक्षणिक संस्था आर्थिक अडचणीत असल्याचे स्पष्ट होत आहे. शिक्षण हक्क कायद्यांतर्गत राज्य शासनाकडे प्रलंबित असलेली आरटीई शुल्क प्रतिपूर्तीची रक्कम शाळेला अदा केली नाही. त्यामुळे शाळा अडचणीत सापडली आहे, असे शाळा प्रशासनाकडून पालकांना सांगितले जात आहे. मात्र आरटीई शुल्क प्रतिपूर्ती, शिक्षक व शिक्षकेतर कर्मचाऱ्यांचे वेतन, हा सर्व प्रश्न शाळा व्यवस्थापनाशी निगडित आहे. पालक व विद्यार्थ्यांचा त्याच्याशी कुठलाही संबंध नाही. परंतु शाळा बंद असल्याने विद्यार्थ्यांच्या शिक्षणावर परिणाम होत आहे. त्यामुळे याबाबत शासनाने लक्ष घालावे अशी मागणी केली जात आहे.