सेट परीक्षा ७ एप्रिलला, अर्ज किती तारखेपासून भरता येणार ; सविस्तर वेळापत्रक
12 जानेवारीपासून भरता येणार परीक्षेचा ऑनलाईन अर्ज.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या (Savitribai Phule Pune University) सेट विभागातर्फे सहाय्यक प्राध्यापक पदाच्या पात्रतेसाठी घेतली जाणारी ३९ वी शेवटची ऑफलाईन सेट परीक्षा (SET exam) येत्या ७ एप्रिल रोजी होणार आहे.तसेच दोन दिवसात सेट परीक्षेची सविस्तर जाहिरात (Advertisement of Set Exam) प्रसिध्द केली जाणार असून येत्या 12 जानेवारीपासून येत्या 31 जानेवारीपर्यंत नियमीत शुल्कासह परीक्षा अर्ज भरण्यास वेळा दिला जाणार आहे.त्यामुळे सेट परीक्षा अर्ज भरण्याची वाट पाहणाऱ्या विद्यार्थ्यांची प्रतिक्षा लवकरच संपणार आहे,असे विश्वसनीय सूत्रांनी सांगितले.
विद्यापीठ अनुदान आयोगाच्या निर्देशानुसार सावित्रीबाई फुले पुणे विद्यापीठाच्या सेट विभागातर्फे महाराष्ट्र व गोवा राज्यातील विद्यार्थ्यांसाठी सेट परीक्षेचे आयोजन केले जाते. नेट परीक्षेप्रमाणेच सेट परीक्षा सुद्धा ऑनलाईन पद्धतीने घ्यावी, अशा सूचना देण्यात आल्या होत्या.परंतु, विद्यापीठातर्फे एप्रिल महिन्यात होणारी सेट परीक्षा ही ऑफलाइन पद्धतीने घेतली जाणार आहे. मात्र, यापुढील ४० वी सेट परीक्षा ही ऑनलाइन पद्धतीने घेतली जाईल. तसेच या परीक्षेच्या संदर्भातील वेळापत्रक, अभ्यासक्रम व इतर अनुषंगिक माहिती वेळोवेळी विद्यापीठाच्या संकेतस्थळावर प्रसिद्ध केली जाणार आहे.
हेही महत्वाचे : बार्टीकडून संशोधक विद्यार्थ्यांची घोर फसवणूक; परीक्षा रद्दचा निर्णय घेतला मागे
सूत्रांनी दिलेल्या माहितीनुसार येत्या दोन दिवसांत सेट परीक्षेची जाहिरात प्रसिध्द केली जाणार असून विद्यार्थ्यांना नियमित शुल्कानुसार 12 जानेवारीपासून अर्ज करता येणार आहे.तर फेब्रुवारीच्या पहिल्या आठवड्यात विलंब शुल्कासह अर्ज स्वीकारले जातील.परीक्षेचे हॉल तिकीट व इतर माहिती सेट विभागाच्या संकेतस्थळावर उपलब्ध करून दिली जाणार आहे.
