शाळा, महाविद्यालयांना 26 जुलै रोजी सुध्दा सुट्टी
26 जुलै रोजी सुद्धा अतिवृष्टी होण्याचा इशारा देण्यात आला असल्याने जिल्ह्यातील शाळा व महाविद्यालयांना शुक्रवारी सुद्धा सुट्टी जाहीर करण्यात आली आहे.
Eduvarta
एज्युवार्ता न्युज नेटवर्क
पुणे जिल्ह्यात विविध ठिकाणी झालेल्या अतिवृष्टीमुळे जनजीवन विस्कळीत झाले. हवामान विभागाने दिलेल्या अतिवृष्टीच्या इशाऱ्यामुळे जिल्हाधिकारी डॉ.सुहास दिवसे यांनी 25 जुलै रोजी शाळांना सुट्टी (school holiday)जाहीर केली. 26 जुलै रोजी सुद्धा अतिवृष्टी होण्याचा इशारा देण्यात आला असल्याने जिल्ह्यातील शाळा व महाविद्यालयांना शुक्रवारी सुद्धा सुट्टी जाहीर करण्यात आली आहे, याबाबतचा अधिकृत आदेश जिल्हाधिकारी कार्यालयातर्फे प्रसिद्ध करण्यात आला आहे.
हवामान विभागाने पुणे जिल्ह्याला मुसळधार पावसाचा इशारा दिला असल्याने भोर, वेल्हा ,मावळ, मुळशी ,हवेली तालुक्यातील खडकवासला परिसर, खेड ,आंबेगाव, जुन्नर, घाट माथ्यावरील शाळा आणि पुणे व पिंपरी चिंचवड शहरातील सर्व अंगणवाडी सर्व सरकारी व खाजगी प्राथमिक व माध्यमिक शाळा, जिल्हा परिषद शाळा, नगरपालिका, अनुदानित व विनाअनुदानित शाळा, सर्व आश्रम शाळा सर्व महाविद्यालये व आयुक्त व्यवसाय व प्रशिक्षण केंद्र यांच्या आस्थापने वरील शैक्षणिक संस्थांमधील सर्व विद्यार्थ्यांना 26 जुलै रोजी सुट्टी जाहीर केली आहे.
अतिवृष्टीमुळे कोणत्याही प्रकारची अनूचित घटना घडू नये. तसेच आपत्कालीन परिस्थिती निर्माण होऊन त्याचा परिणाम शालेय विद्यार्थ्यांवर होवू नये. याकरीता जिल्ह्यातील सर्व शाळांना व महाविद्यालयांना सुट्टी आहे. मात्र, या कालावधीत सर्व मुख्याध्यापक, शिक्षक व शिक्षकेत्तर कर्मचारी यांनी कार्यालयीन वेळेत शाळेत उपस्थित राहून स्थानिक प्रशासनाच्या आदेशानुसार आपत्ती व्यवस्थापनाचे कामकाज करावे, असेही आदेशात नमूद करण्यात आले आहे.
दरम्यान ,25 जुलै रोजी जिल्हा प्रशासनाकडून शाळांना सुट्टी जाहीर करण्याचा आदेश उशिरा प्रसिद्ध करण्यात आला. त्यामुळे विद्यार्थी, पालक व शिक्षकांची तारांबळ उडाली.त्यामुळे पुणे जिल्ह्यातील एकूण पूरस्थिती लक्षात घेता जिल्हाधिकारी कार्यालयाने लवकरात लवकर शाळांना सुट्टी देण्याबाबत आदेश प्रसिद्ध करावा, अशा सूचना राज्याचे उच्च व तंत्र शिक्षण मंत्री चंद्रकांत पाटील यांनी पत्राद्वारे जिल्हाधिकाऱ्यांना दिल्या होत्या.
