MPSC : भरतीसाठी वयोमर्यादेत एक वर्षाची वाढ
राज्य सरकारने एमपीएससी सेवेतील विविध पदांच्या भरतीसाठीच्या कमाल वयोमर्यादेत एक वर्षाने वाढ करण्याचा निर्णय नुकताच घेतला आहे. त्यामुळे वयोमर्यादा ओलांडल्याने नोकरीपासून वंचित राहण्याची चिंता लागलेल्या लाखो उमेदवारांना यामुळे मोठा दिलासा मिळाला आहे.
eduvarta@gmail.com 
एज्युवार्ता न्यूज नेटवर्क
राज्यात स्पर्धा परीक्षेची (Competitive Examination Students) तयारी करणारे लाखो विद्यार्थी आहेत. मात्र, वयोमर्यादा ओलांडल्याने काही विद्यार्थ्यांच्या अधिकारी होण्याच्या स्वप्नांवर पाणी फिरले होते. मात्र, आता या उमेदवारांना काहीसा दिलासा मिळणार आहे. कारण राज्य सरकारने एमपीएससी (MPSC) सेवेतील विविध पदांच्या भरतीसाठीच्या कमाल वयोमर्यादेत एक वर्षाने वाढ (Increase in age limit by one year) करण्याचा निर्णय घेतला आहे. त्यामुळे वयोमर्यादा ओलांडल्याने नोकरीपासून वंचित राहण्याची चिंता लागलेल्या लाखो उमेदवारांना यामुळे मोठा दिलासा मिळाला आहे.
काही महिन्यांपूर्वी राज्य सरकारने मराठा समाजातील सामाजिक आणि शैक्षणिकदृष्टया मागास वर्गाकरिता १० टक्के आरक्षण लागू करण्यात आले आहे. मराठा समाजाच्या आरक्षणाची प्रक्रिया सुरू असतानाच एमपीएससीने पदभरतीच्या जाहिराती प्रसिद्ध केल्या होत्या. मात्र राज्य सरकारने या जाहिरातीमध्ये बदल करून मराठा समाजाच्या आरक्षणाचा समावेश करण्याचे आदेश दिले.
सुधारित जाहिराती प्रसिद्धीस आयोगाला २०२४ च्या नियोजित वेळापत्रकापेक्षा विलंब झाला आहे. परिणामी वयोमर्यादा ओलांडल्याने लाखो उमेदवार भरती प्रक्रियेपासून वंचित राहण्याची भीती निर्माण झाली होती. या निर्णयामुळे अशा उमेदवारांना दिलासा मिळणार आहे. ‘एमपीएससी’च्या १ जानेवारी ते २० डिसेंबर २०२४ पर्यंत पदभरतीसाठी ज्या जाहिराती नव्याने प्रसिद्ध करण्यात आल्या आणि ज्यांच्या निवड प्रक्रियेचा कोणताही टप्पा पार पडलेला नाही, अशा जाहिरातींसाठी अर्ज केलेल्या उमेदवारांना कमाल वयोमर्यादेत शिथिलता देण्यात आली आहे. त्यामुळे पात्र उमेदवारांना विशेष बाब म्हणून अर्ज करण्याची संधी देण्याचे आदेश सरकारने दिले आहेत.
