पुणे प्राथमिक शिक्षण अधिकारी संजय नाईकडे यांची बदली; नवीन कोण आले? 

एज्युवार्ता न्यूज नेटवर्क 

राज्याच्या शालेय शिक्षण विभागातर्फे प्राथमिक शिक्षण अधिकाऱ्यांच्या बदल्या करण्यात आल्या आहेत. त्यात पुणे जिल्हा परिषदेचे प्राथमिक शिक्षण अधिकारी संजय नाईकडे यांची रायगड येथे प्राथमिक शिक्षण अधिकारी म्हणून बदली करण्यात आली आहे. त्याच बरोबर इतरही पाच अधिकाऱ्यांच्या बदल्या करण्यात आल्या आहेत. 

भानुदास रतिलाल रोकडे यांची जिल्हा परिषद नंदुरबार येथील शिक्षणाधिकारी (प्राथमिक) पदावरून त्याच जिल्ह्यातील शिक्षणाधिकारी (माध्यमिक) म्हणून बदली करण्यात आली आहे. तर ललिता शहाजी दहितुले (कावडे) यांची जिल्हा परिषद रायगड येथील शिक्षणाधिकारी (प्राथमिक) पदावरून जिल्हा परिषद पुणे येथे शिक्षणाधिकारी (प्राथमिक) म्हणून नियुक्ती करण्यात आली आहे.

संजय दत्तात्रय नाईकडे यांची जिल्हा परिषद पुणे येथील शिक्षणाधिकारी (प्राथमिक) पदावरून जिल्हा परिषद रायगड येथे बदली करण्यात आली आहे. सुनिल साईनाथ पोलास यांची जिल्हा परिषद परभणी येथील शिक्षणाधिकारी (प्राथमिक) पदावरून छत्रपती संभाजीनगर येथील शिक्षण उपसंचालक कार्यालयात सहाय्यक शिक्षण संचालक म्हणून नियुक्ती करण्यात आली आहे. तसेच विठ्ठल केशवराव भुसारे यांची जिल्हा परिषद वाशिम येथील शिक्षणाधिकारी (योजना) पदावरून शिक्षणाधिकारी (प्राथमिक), जिल्हा परिषद वाशिम या पदावर बदली करण्यात आली आहे.

शासनाने शिक्षण आयुक्त यांना संबंधित अधिकारी यांना त्यांच्या सध्याच्या पदभारातून तात्काळ कार्यमुक्त करण्याचे निर्देश दिले आहेत. तसेच बदली झालेले अधिकारी विहित कालावधीत नव्या पदस्थापनेच्या ठिकाणी रुजू होतील, याची खातरजमा करून त्याबाबतचा अहवाल शासनाकडे सादर करण्याच्या सूचनाही देण्यात आल्या आहेत. ही बदली महाराष्ट्र शासकीय कर्मचाऱ्यांच्या बदल्यांचे विनियमन आणि शासकीय कर्तव्ये पार पाडताना होणाऱ्या विलंबास प्रतिबंध अधिनियम, २००५ मधील कलम ४(४)(दोन) आणि कलम ४(५) अन्वये करण्यात आली असल्याचे शासनाने स्पष्ट केले आहे.