पुस्तक महोत्सवाचे नवी पिढी घडविण्यात मोठे योगदान: प्रवीण तरडेंच्या हस्ते पुस्तकांचे वितरण
पुस्तक हे मनाची मशागत करण्याचे साधन आहे. पुणे पुस्तक महोत्सव हा सर्व वयोगटातील व्यक्तींसाठी असला तरी लहान मुलांसाठी हा महोत्सव अधिक प्रेरणादायी ठरणार आहे.
eduvarta@gmail.com 
एज्युवार्ता न्यूज नेटवर्क
Pune Book Festival: शालेय वयात मिळणारी वाचन प्रेरणा भविष्याची गुरुकिल्ली असते. पुणे पुस्तक महोत्सवानिमित्त शालेय विद्यार्थ्यांना मोफत पुस्तक दिले जात आहे, हा आनंददायी अनुभव आहे. नवीन पिढी घडविण्यात मोठे योगदान आहे, असे मत प्रसिद्ध लेखक, अभिनेते आणि दिग्दर्शक प्रवीण तरडे (Praveen Tarde)यांनी व्यक्त केले.
राष्ट्रीय पुस्तक न्यास, पुणे पुस्तक महोत्सव आणि महाराष्ट्र नॅचरल गॅस लि. तर्फे मोफत पुस्तक वितरणाचा शुभारंभ आज 'आनंदमठ' हे पुस्तक देऊन करण्यात आला. यावेळी प्रमुख पाहुणे म्हणून प्रसिद्ध लेखक, अभिनेते आणि दिग्दर्शक प्रवीण तरडे बोलत होते. यावेळी व्यासपीठावर महाराष्ट्र नॅचरल गॅसचे कार्यकारी संचालक कुमार शंकर, पुणे पुस्तक महोत्सवाचे मुख्य संयोजक राजेश पांडे, पुणे पुस्तक महोत्सव संयोजन समिती सदस्य भाग्यश्री मंठाळकर आणि नवीन शैक्षणिक धोरण राज्य शासन समिती सदस्य डॉ. गोविंद कुलकर्णी उपस्थित होते.यावेळी पुणे महानगरपालिकेचे संत रामदास स्वामी विद्यालय आणि डेक्कन एज्युकेशन सोसायटीचे न्यू इंग्लिश स्कूल रमणबाग या शाळांमधील विद्यार्थ्यांना प्रातिनिधिक स्वरूपात बंकिमचंद्र चटोपाध्याय यांची 'आनंदमठ' ही कादंबरी मोफत देण्यात आली.
प्रवीण तरडे म्हणाले,आजपर्यंत मी ३ ते ४ हजार पुस्तके वाचली आहेत. पण मला शाळेत पहिल्यांदा मिळालेले व. पु. काळे यांंचे 'आपण सारे अर्जुन' हे माझे सगळ्यात आवडते पुस्तक आहे. पुस्तक हे मनाची मशागत करण्याचे साधन आहे. पुणे पुस्तक महोत्सव हा सर्व वयोगटातील व्यक्तींसाठी असला तरी लहान मुलांसाठी हा महोत्सव अधिक प्रेरणादायी ठरणार आहे.
कुमार शंकर म्हणाले, पुणे पुस्तक महोत्सव ही अतिशय अभिनव संकल्पना असून सामाजिक उत्तरदायित्वाच्या भावनेतून या उपक्रमात महाराष्ट्र नॅचरल गॅस योगदान देत असल्याचा आनंद वाटतो आहे. यंदा 'वंदे मातरम्' या गीताला आणि बंकिमचंद्र चटोपाध्याय यांच्या 'आनंदमठ' या कादंबरीला १५० वर्ष पूर्ण झाल्याबद्दल एक लाख २५ हजार मुलांना हे पुस्तक भेट दिले जाणार आहे.
कार्यक्रमाचे प्रास्ताविक पुणे पुस्तक महोत्सवाचे मुख्य संयोजक राजेश पांडे यांनी केले. सूत्रसंचालन नवीन शैक्षणिक धोरण राज्य शासन समिती सदस्य डॉ. गोविंद कुलकर्णी यांनी केले. पुणे पुस्तक महोत्सव संयोजन समिती सदस्य भाग्यश्री मंठाळकर यांनी आभार मानले.
