बलात्काराच्या घटनेच्या निषेधार्थ विद्यार्थी संघटनांचे आंदोलन

एज्युवार्ता न्यूज नेटवर्क 

पुण्यातील नामांकित महाविद्यालयामधील विद्यार्थिनीवर झालेल्या बलात्काराच्या पार्श्वभूमीवर विविध विद्यार्थी संघटनांनी संबंधित महाविद्यालयाच्या आवारात आंदोलने करून महाविद्यालय प्रशासनाचा निषेध केला.पीडित विद्यार्थिनीला न्याय मिळालाच पाहिजे, अशी मागणी करत विद्यार्थी संघटनांनी महाविद्यालयाचा परिसर दणाणून सोडला. तसेच आणखी काही संघटनांनी शनिवारी आंदोलन कऱण्याचा इशारा दिला. 

नामांकित महाविद्यालयातील विद्यार्थ्यांनीवर अत्याचार झाल्याची घटना समोर आल्याने विद्यार्थी व पालकांकडून संताप व्यक्त केला जात आहे. त्यातच ही घटना महाविद्यालयातील प्राध्यापकाच्या मुलीच्या बाबतच घडली असल्याचा आरोप संघटनांकडून केला जात आहे. पोलीस व महाविद्यालय प्रशासनाने या घटनेकडे गांभीर्याने न पाहता घटना दडपण्याचा प्रयत्न केला. बदलापूर घटनेच्या पार्श्वभूमीवर संबंधित महाविद्यालयाच्या प्रशासनावर सुद्धा गुन्हा दाखल करून कारवाई करावी,अशी मागणी संघटनांनी केली.

काँग्रेसचे आमदार रवींद्र धंगेकर यांनी या घटनेत उपजिल्हाधिकाऱ्याच्या मुलाचा उल्लेख केल्याने अनेकांच्या भुवया उंचावल्या आहेत. रिपब्लिकन विद्यार्थी सेना, एन एस यु आय आदी विद्यार्थी संघटनांनी महाविद्यालयाच्या आवारात आंदोलने केली.विद्यार्थी काँग्रेसचे प्रदेशाध्यक्ष आमिर शेख, युवक काँग्रेसचे प्रसारमाध्यम विभागाचे अध्यक्ष अक्षय जैन, एनएसयुआईचे उपाध्यक्ष उमेश खंदारे,जिल्हाध्यक्ष भूषण रानभरे, एडवोकेट कौस्तुभ पाटील, युवराज नायडू, कबीर खान, प्रसन्न मोरे, राज जाधव आदी आंदोलनात सहभागी झाले होते.