कीर्तन सोहळ्याने म.ए.सो. ज्ञानमंदिर कळंबोली विद्यालयात गुरुपौर्णिमा साजरी
विविध रूपकात्मक उदाहरणांच्या माध्यमातून त्यांनी संस्कार व नैतिक मूल्यांचा संदेश दिला.
Eduvarta
एज्युवार्ता न्यूज नेटवर्क
महाराष्ट्र एज्युकेशन सोसायटीच्या ज्ञानमंदिर कळंबोली विद्यालयात मंगळवारी गुरुपौर्णिमेनिमित्त गुरुपूजन व विशेष कीर्तन सोहळ्याचे आयोजन करण्यात आले. कार्यक्रमाचा प्रारंभ दीपप्रज्वलन, सरस्वती पूजन व महर्षी वेदव्यास यांच्या प्रतिमापूजनाने झाला.
या प्रसंगी प्रसिद्ध कीर्तनकार सौ. वर्षा रानडे-सहस्रबुद्धे यांनी गुरुंचे मानवी जीवनातील महत्त्व, समृद्ध संतपरंपरा व भारतीय संस्कृतीतील गुरु-शिष्य नाते यावर अत्यंत प्रभावी कीर्तन सादर केले. विविध रूपकात्मक उदाहरणांच्या माध्यमातून त्यांनी संस्कार व नैतिक मूल्यांचा संदेश दिला. त्यांच्या ओघवत्या वाणीने उपस्थित विद्यार्थी, शिक्षक, पालक व मुख्याध्यापिका मंत्रमुग्ध झाले. या कीर्तनाला श्री. गणेश घाणेकर यांनी तबला तर श्री. चंद्रकांत मने यांनी पेटीची सुरेल साथ दिली.
कार्यक्रमाच्या शेवटी सौ. थळे मॅडम यांनी आभार मानले. विद्यालयाच्या मुख्याध्यापिका सौ. समिता सोमण यांनी असा प्रेरणादायी कार्यक्रम पार पडल्याबद्दल समाधान व्यक्त केले व कीर्तनकारांचे आभार मानले. हा सोहळा विद्यार्थ्यांच्या मनावर संस्कार करणारा व गुरूविषयी आदरभाव वाढवणारा ठरला.
