पवित्र पोर्टलद्वारे गुणवत्तापूर्ण उमेदवारांची शिक्षक पदी निवड करण्याचा नवा GR प्रसिध्द

एज्युवार्ता न्यूज नेटवर्क 

न्यायालयाच्या आदेशानुसार  पवित्र पोर्टलद्वारे शिक्षक भरती अधिक पारदर्शकपणे राबवण्यासाठी शासनाने नुकताच अद्यायदेश प्रसिद्ध केला होता.आता या भरती प्रक्रियेतून अधिकाधिक गुणवत्तापूर्ण उमेदवारांची निवड कशी करावी त्यासाठी गुणांकन (मानक) पध्दती प्रसिध्द केली आहे.त्यामुळे पुढील काळात पवित्र पोर्टलद्वारे अधिक चांगल्या उमेदवारांची निवड होईल,अशी अपेक्षा आहे. 

शासनाने प्रसिद्ध केलेल्या अध्यादेशानुसार अधिक पारदर्शकपणे उच्च गुणवत्ताधारक उमेदवारांची शिक्षक पदावर निवड व नियुक्ती करता यावी व एकूणच शिक्षक पदभरती प्रक्रियेची विश्वासर्हता वाढावी, यासाठी मुलाखतीसह हा शिक्षक पदभरतीचा विकल्प स्वीकारणाऱ्या शैक्षणिक संस्थांनी त्यांना उपलब्ध करुन देण्यात आलेल्या उमेदवारांपैकी सर्वाधिक योग्य उमेदवाराची निवड करण्यासाठी या शासन निर्णयासोबत जोडलेल्या परिशिष्टाप्रमाणे गुणांकन प्रक्रिया अवलंबविणे आवश्यक राहील.

 सुधारित गुणांकन प्रक्रियेनुसार एकूण १०० गुणांपैकी सर्वाधिक गुण प्राप्त करणाऱ्या उमेदवाराची निवड करुन त्यास नियुक्ती देणे क्रमप्राप्त राहील. उमेदवारांना समसमान गुण प्राप्त झाले असतील, अशा परिस्थितीत ज्या उमेदवाराचे वय अधिक आहे, अशा उमेदवाराची निवड करुन त्यास नियुक्ती देणे क्रमप्राप्त राहील. उमेदवारांचे वय देखील सारखे असल्यास इयत्ता १२ वी चे गुण विचारात घेण्यात यावेत. संबंधित शिक्षणाधिकारी/शिक्षण उपसंचालक यांनी संबंधित संस्थेस उपलब्ध करुन देण्यात आलेल्या सर्व उमेदवारांचे विहित प्रकारे गुणांकन झाले आहे किंवा कसे, याची खातरजमा करुनच उमेदवाराच्या निवडीस व नियुक्तीस मान्यता द्यावी.शिक्षक अभियोग्यता व बुध्दीमत्ता चाचणी-सन २०२५ या परीक्षेतील व यापुढे होणाऱ्या अशा परीक्षेतील गुणांच्या आधारे शिक्षक पदभरतीसाठी प्रस्तावांतर्गत गुणांकन प्रक्रिया लागू राहील,असे 2 एप्रिल 2026 रोजी प्रसिद्ध केलेल्या अध्यादेशानुसार प्रसिद्ध करण्यात आले आहे.