नीट UG 2026 परीक्षेचा निकाल जाहीर; पंजाबचा आर्यन गुप्ता, हरियाणाचा पान्शुल बन्सल देशात संयुक्तपणे प्रथम 

एज्युवार्ता न्यूज नेटवर्क 

राष्ट्रीय परीक्षा संस्था (एनटीए)ने नीट (यूजी) २०२६ परीक्षेचा निकाल जाहीर केला असून, देशभरातील सुमारे २० लाख विद्यार्थ्यांपैकी ११.२१ लाख विद्यार्थी वैद्यकीय, दंतवैद्यकीय, आयुष आणि संलग्न पदवी अभ्यासक्रमांच्या प्रवेशासाठी पात्र ठरले आहेत. पंजाबचा आर्यन गुप्ता आणि हरियाणाचा पान्शुल बन्सल यांनी प्रत्येकी ७१५ गुण मिळवत देशात संयुक्तपणे प्रथम क्रमांक पटकावला आहे.तर महाराष्ट्राची श्रावणी कुदळे देशात पाचव्या क्रमांकावर असून मुलींमध्ये देशात पहिल्या क्रमांकावर आहे. तिला 99.99965 पर्सेंटईल गुण आहेत. वैद्यकीय प्रवेश प्रक्रिया आणि समुपदेशन (कौन्सेलिंग) नियोजित वेळापत्रकानुसार पार पडावे, यासाठी निकाल वेळेत जाहीर करण्यात आल्याचे एनटीएने स्पष्ट केले आहे.

नीट पेपर फुटीनंतर एनटीएतर्फे पुन्हा एकदा नीट परीक्षेचे आयोजन करण्यात आले होते. ही  नीट परीक्षा देशातील ५५१ शहरांमधील ५,४४० परीक्षा केंद्रांवर तसेच परदेशातील १४ शहरांमध्ये घेण्यात आली. परीक्षेच्या निकालासोबतच गुणपत्रिका, अखिल भारतीय गुणवत्ता क्रमवारी (All India Rank), राज्यनिहाय व प्रवर्गनिहाय अव्वल विद्यार्थ्यांची यादी तसेच कट-ऑफ गुणांची माहिती अधिकृत संकेतस्थळावर उपलब्ध करून देण्यात आली आहे.

यंदाच्या परीक्षेत ७२० पैकी ६९० हून अधिक गुण मिळवणाऱ्या विद्यार्थ्यांची संख्या १३८ आहे. त्यापैकी ९३ टक्क्यांहून अधिक विद्यार्थ्यांनी नीट परीक्षा प्रथमच दिली होती, तर ९९ टक्के अव्वल विद्यार्थी १७ ते १९ वयोगटातील आहेत. यंदाच्या निकालात मुलींची कामगिरी विशेष उल्लेखनीय ठरली आहे. पात्र विद्यार्थ्यांमध्ये ५८ टक्क्यांहून अधिक मुली असून, मुलींचा यशाचा टक्का ५६.८ टक्के तर मुलांचा ५५.१ टक्के राहिला आहे.

निकालानुसार, १९ विद्यार्थ्यांनी ७०० पेक्षा अधिक गुण मिळवले आहेत. तसेच १,४९२ विद्यार्थ्यांनी ६५० पेक्षा अधिक, १०,१६० विद्यार्थ्यांनी ६०० पेक्षा अधिक आणि ९०,७८० विद्यार्थ्यांनी ५०० पेक्षा अधिक गुण मिळवले आहेत.

देशातील सर्व ३६ राज्ये आणि केंद्रशासित प्रदेशांमधून विद्यार्थी पात्र ठरले आहेत. उत्तर प्रदेशातून सर्वाधिक १.७ लाखांहून अधिक विद्यार्थी पात्र झाले, तर लक्षद्वीपमधून ४३ विद्यार्थ्यांनी पात्रता मिळवली. राज्यनिहाय अव्वल विद्यार्थ्यांमध्ये लडाखची जिग्मेट यांगचेन लामो, अंदमान-निकोबारचे ध्रुव त्रिपाठी आणि लक्षद्वीपची फहमीदा अनीस यांचा समावेश आहे. देशातील १७ राज्यांतील अव्वल विद्यार्थ्यांनी ७०० किंवा त्यापेक्षा अधिक गुण मिळवले आहेत.

नीट (यूजी) २०२६ परीक्षा हिंदी, इंग्रजी, मराठीसह एकूण १३ भाषांमध्ये घेण्यात आली. एनटीएने स्पष्ट केले आहे की, एमबीबीएस आणि बीडीएसच्या अखिल भारतीय कोट्याचे समुपदेशन वैद्यकीय समुपदेशन समिती (MCC) मार्फत, तर राज्य कोट्याचे समुपदेशन संबंधित राज्य सरकारांकडून केले जाणार आहे.

एनटीएने विद्यार्थ्यांना प्रवेश मिळवून देणे, जागा निश्चित करून देणे किंवा गुण वाढवून देण्याचे आमिष दाखविणाऱ्या फसवणूक करणाऱ्यांपासून सावध राहण्याचा इशारा दिला आहे. विद्यार्थ्यांनी केवळ अधिकृत संकेतस्थळांवरील माहितीवर विश्वास ठेवावा आणि संशयास्पद कॉल, संदेश किंवा संकेतस्थळांची तक्रार तातडीने एनटीएकडे करावी, असे आवाहन करण्यात आले आहे.