NEET PG 2024 परीक्षेची तारीख जाहीर; 11 ऑगस्टला परीक्षा
परीक्षा येत्या 11 ऑगस्ट रोजी घेण्यात येणार आहे. ही परीक्षा दोन शिफ्टमध्ये घेतली जाणार आहे.
eduvarta@gmail.com 
एज्युवार्ता न्यूज नेटवर्क
NEET PG 2024 परीक्षा केव्हा होणार याची वाट पाहणाऱ्या उमेदवारांसाठी मोठी बातमी आहे . नॅशनल बोर्ड ऑफ एक्झामिनेशन इन मेडिकल सायन्सेस (NBEMS) ने NEET PG परीक्षेची तारीख जाहीर केली आहे. त्यानुसार परीक्षा येत्या 11 ऑगस्ट रोजी घेण्यात येणार आहे. ही परीक्षा दोन शिफ्टमध्ये घेतली जाणार आहे. NEET PG 2024 ची परीक्षा यापूर्वी 23 जून रोजी घेतली जाणार होती. मात्र, परीक्षेपूर्वी 12 तास आधी केंद्रीय आरोग्य आणि कुटुंब कल्याण मंत्रालयाने प्रसिद्धी पत्रक जाहीर करून ही परीक्षा स्थगित केल्याचे जाहीर केले होते.
NEET PG परीक्षा रद्द केल्यानंतर NBE चे अध्यक्ष डॉ. अभिजात सेठ यांच्या वतीने सांगण्यात आले की, "कोणत्याही प्रकारची अनियमितता होण्याची किंचितही शक्यता असू नये यासाठी परीक्षा रद्द करण्याचा निर्णय घेण्यात आला आहे. त्यांनी असेही म्हटले होते की, NBE गेल्या सात वर्षांपासून NEET-PG आयोजित करत आहे. बोर्डाच्या कठोर एसओपीमुळे, पेपर लीकचा कोणताही अहवाल किंवा प्रकरण अद्याप समोर आलेले नाही.
दरम्यान, NEET परीक्षा यशस्वीपणे पार पाडण्यासाठी सरकारने कठोर पाऊले उचलली आहेत. परीक्षेसंदर्भात बैठकीत सुचविलेल्या उपाययोजनांमध्ये परीक्षेच्या दोन तास आधी प्रश्नपत्रिका तयार करण्याचा विचार केला आहे. परीक्षेची नवीन तारीख जाहीर होण्यापूर्वी केंद्रीय गृह मंत्रालयाच्या अधिकाऱ्यांनी परीक्षेतील गैरप्रकारांबाबत सरकारच्या सायबर गुन्हे विरोधी संस्थेची भेट घेतली होती.
