अग्निशमन सुरक्षेची पूर्तता करण्यासंदर्भात महापालिकेचे शाळांना पत्र

एज्युवार्ता न्यूज नेटवर्क

सध्या मोठ्या शहरांमध्ये आगीचे प्रमाण खुप वाढले आहे. त्या पार्श्वभूमीवर पिंपरी चिंचवड महापालिकेच्या (Pimpri Chinchwad Municipal Corporation) अग्निशमन विभागाकडून अग्निशामक सुरक्षा प्रमाणपत्राची पूर्तता (Completion of fire safety certificate) करण्यासाठी शहरातील सहाशे पेक्षा अधिक शाळा, महाविद्यालयांना पत्र (Letter to schools and colleges) पाठवले आहे. तसेच उर्वरित सर्व अस्थापनाच्या शाळा, महाविद्यालयांना पत्र पाठवले जाणार असल्याची माहिती वरिष्ठ अधिकाऱ्याने दिली आहे. ज्या शाळा सुरक्षा प्रमाणपत्र देणार नाहीत, त्यांना नोटीस बजावण्यात येणार आहे, अशी माहिती देण्यात आली आहे. 

शहरातील रुग्णालयांपाठोपाठ शाळांमध्ये अग्निसुरक्षेची काय व्यवस्था आहे, याची तपासणी अग्रिशमन दलाकडून केली जाणार आहे. या कार्यवाहींचा पहिला टप्पा म्हणून शाळांना अग्निशामक सुरक्षा प्रमाणपत्राची पूर्तता करण्यासाठी पत्रव्यवहार केला जात आहे. त्यानंतर संबंधितांना त्यानुसार आवश्यक कार्यवाही करण्यासाठी १५ दिवसांची मुदत दिली जाईल. 

या मुदतीमध्ये त्यांनी आगीपासून सुरक्षेसाठी आवश्यक उपकरणे व अन्य बाबी बसविणे, बसविलेती उपकरणे सुस्थितीत आहेत का? याची तपासणी करणे गरजेचे आहे. शाळांना दिलेली मुदत संपल्यानंतर त्यांना प्रत्यक्ष नोटिसा बजावल्या जाणार आहेत. त्यानंतरही शाळांकडून याबाबत दुर्लक्ष करण्यात आल्यास 'अग्निसुरक्षा अधिनियम २०००५ नुसार संबंधित शाळांविरोधात अग्निशमन दलाकडून कार्यवाही केली जाणार असल्याचे सांगण्यात आले आहे. 
______________________________________

शहरात आगीच्या सातत्याने होत असलेल्या घटनांच्या पार्श्वभूमीवर आयुक्तांच्या सूचनेनुसार शाळांनी अग्निसुरक्षा पूर्तता प्रमाणपत्र घेतले आहे का, याची पडताळणी केली जात आहे. त्यासाठी पुढील आठवडाभरात शाळांना पत्र पाठ‌विण्यात येणार आहे. त्यानंतर देण्यात आलेल्या माहितीच्या आधारे शाळांची प्रत्यक्ष पडताळणी केली जाणार आहे. 

मनोज लोणकर, उपायुक्त अग्निशमन विभाग, चिंचवड महापालिका