पीएचडीच्या विद्यार्थ्यांना विद्यापीठात पाठवू नका; विद्यापीठाचे परिपत्रक

एज्युवार्ता न्यूज नेटवर्क 

विद्यार्थ्यांच्या (students) ज्या काही अडी-अडचणी असतील, त्या संबंधित संशोधन केंद्रांनी (Research centers) त्यांच्या प्रतिनिधी/कर्मचारी यांच्यामार्फत विद्यापीठाच्या शैक्षणिक प्रवेश विभागाकडे (Department of Academic Admissions) पाठवून त्याची पूर्तता करण्याची आवश्यकता असते. परंतु, असे न होता बहुतकेवेळा विद्यार्थ्यांना प्रत्यक्ष विद्यापीठाकडे जाण्याचा सल्ला दिला जातो.त्या पार्श्वभूमीवर आता सावित्रीबाई फुले पुणे विद्यापीठामार्फत (Savitribai Phule Pune University) परिपत्रकाद्वारे सूचना देण्यात आल्या आहेत. 

विद्यार्थ्यांना आवश्यक असणा-या सोयी-सुविधा आणि मदत संबंधित संशोधन केंद्रामध्ये उपलब्ध होण्याच्या दृष्टीकोनातून संशोधन केंद्र प्रमुखांनी नेमलेल्या समन्वयकांना याबाबत तातडीने सूचना देऊन विद्यापीठाच्या पीएच्.डी. संदर्भातील सर्व परिपत्रकांचे अवलोकन करून विद्यार्थ्यांना त्याबाबत अवगत करण्यात यावे. यापुढे विद्यार्थ्यांच्या पीएच्.डी. प्रक्रियेसंदर्भातील प्रशासकीय कामकाजासाठी विद्यार्थ्यांना विद्यापीठाकडे न पाठवता संशोधन केंद्राचे केंद्रप्रमुख/समन्वयक/प्राधिकृत कर्मचारी यांनाच शैक्षणिक प्रवेश विभागामध्ये पाठविण्यात यावे, अशा सूचना विद्यापीठाचे उपकुलसचिव डॉ. मुंजाजी रासवे यांनी दिल्या आहेत. 

दरम्यान, सावित्रीबाई फुले पुणे विद्यापीठाने प्रत्येक महाविद्यालयास मान्यताप्राप्त संस्थेस प्रचलित नियमांच्या आधारे संशोधन केंद्र मान्य केले आहे. सदर संशोधन केंद्रामधील विद्यार्थ्यांना आवश्यक असणा-या सोयी-सुविधा आणि इतर आवश्यक प्रक्रियेची माहिती देण्याची जबाबदारी संबंधित संशोधन केंद्रांची, पर्यायाने त्या संशोधन केंद्र प्रमुखाची अथवा त्या प्रमुखांनी नेमलेल्या समन्वयकाची असते. त्याअनुषंगाने विद्यापीठामार्फत हा निर्णय घेण्यात आला आहे.