MPSC ऑनलाईन परीक्षेवर मुख्यमंत्री देवेंद्र फडणवीस यांच्यासोबत विद्यार्थी प्रतिनिधींची सकारात्मक बैठक; उद्याचा मोर्चा तात्पुरता स्थगित
MPSC अध्यक्ष व सचिव यांच्यासोबतची उद्या बैठक झाल्यानंतर विद्यार्थी प्रतिनिधींसोबत पुन्हा बैठक घेण्यात येणार असून, त्यामध्ये पुढील भूमिका आणि निर्णयाची सविस्तर माहिती जाहीर करण्यात येणार आहे.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोगाच्या (MPSC) परीक्षा पद्धतीसंदर्भातील विद्यार्थ्यांच्या विविध मागण्यांवर मंगळवारी मुख्यमंत्री देवेंद्र फडणवीस यांच्या उपस्थितीत विद्यार्थी प्रतिनिधींची महत्त्वपूर्ण बैठक पार पडली. पोलीस प्रशासनाच्या समन्वयातून आयोजित या बैठकीत सुमारे अर्धा तास सविस्तर चर्चा करण्यात आली.बैठकीदरम्यान मुख्यमंत्री फडणवीस यांनी उद्या MPSC चे अध्यक्ष आणि सचिव यांच्यासोबत स्वतंत्र बैठक घेऊन विद्यार्थ्यांच्या सर्व मागण्यांवर सविस्तर चर्चा केली जाईल, असे स्पष्ट केले.
सध्याच्या परिस्थितीत विद्यार्थ्यांवर ऑनलाइन परीक्षा पद्धती लादली जाणार नाही, तसेच भविष्यात ऑनलाइन परीक्षा घेण्याचा विचार झाल्यास सर्व स्पर्धा परीक्षा एकाच वेळी त्या पद्धतीने घेता येईल, अशी सक्षम, पारदर्शक आणि विश्वासार्ह यंत्रणा उभारल्यानंतरच त्याबाबत निर्णय घेतला जाईल, असे त्यांनी सांगितले.
MPSC तर्फे १७ जुलैपर्यंत सुरू असलेल्या संयुक्त पूर्व परीक्षा (गट 'क') अर्ज प्रक्रियेबाबतही पुनर्विचार करण्यात येईल, अशी ग्वाही मुख्यमंत्री फडणवीस यांनी दिली.
मुख्यमंत्री यांनी विद्यार्थ्यांच्या भावना लक्षात घेऊन ऑनलाइन परीक्षा पद्धतीबाबतचा निर्णय सध्या स्थगित ठेवण्याबाबत सकारात्मक आश्वासन दिल्याने, उद्या आयोजित करण्यात आलेला विद्यार्थी मोर्चा तात्पुरता स्थगित करण्याचा निर्णय विद्यार्थी प्रतिनिधींनी घेतला आहे.
MPSC अध्यक्ष व सचिव यांच्यासोबतची उद्या बैठक झाल्यानंतर विद्यार्थी प्रतिनिधींसोबत पुन्हा बैठक घेण्यात येणार असून, त्यामध्ये पुढील भूमिका आणि निर्णयाची सविस्तर माहिती जाहीर करण्यात येणार आहे.
या महत्त्वपूर्ण बैठकीचे आयोजन करून विद्यार्थ्यांना मुख्यमंत्री यांच्या समोर आपली भूमिका मांडण्याची संधी उपलब्ध करून दिल्याबद्दल विद्यार्थी प्रतिनिधींनी पोलीस आयुक्तांचे मनःपूर्वक आभार मानले.
यावेळी आमदार अभिमन्यू पवार, राजेश पांडे आणि राज देशमुख यांनीही विद्यार्थ्यांची भूमिका प्रभावीपणे मांडली. त्यांच्या सहकार्याबद्दल विद्यार्थी प्रतिनिधींनी त्यांचे आभार व्यक्त केले.
या बैठकीस वास्तव कट्टाचे संपादक किरण निंभोरे, महाराष्ट्र युवक काँग्रेस प्रदेशाध्यक्ष शिवराज मोरे, प्रमोद पाटील,लेषपाल जवळगे (सरहद) अक्षय जैन (महाराष्ट्र युवक काँग्रेस), अनिकेत देशमाने (महाराष्ट्र विद्यार्थी संघटना),नितीन आंधळे (विद्यार्थी प्रतिनिधी),अर्चना शहा (काँग्रेस), गणेश उबाळे (महाराष्ट्र युवक काँग्रेस), निखिल मगर (विद्यार्थी प्रतिनिधी) आदी उपस्थित होते.
