मुंबई विद्यापीठ : अन्य भाषिकांसाठी मराठी शिकवणी सुरू, अभ्यासक्रमही तयार..

एज्युवार्ता न्यूज नेटवर्क

राज्यात वास्तव्याला असलेल्या परप्रांतियांना मराठी भाषा बोलायला, लिहायला, वाचायला यावी म्हणून मुंबई विद्यापीठाने (Mumbai University) पुढाकार घेतला आहे. त्यासाठी विद्यापीठाकडून एक वर्षाच्या ऑनलाईन अभ्यासक्रमाला सुरुवात (Start of online course) केली आहे. या अभ्यासक्रमासाठी सध्या प्रवेश प्रक्रिया सुरू (Start the admission process) असून, विद्यापीठातील जर्मन भाषा विभागाचे अधिकृत संकेतस्थळ www.german-mu.com वर जाऊन विद्यार्थ्यांना प्रवेशासाठी अर्ज करता येणार आहेत. यासाठी ऑडिओ व्हिज्युअल सामग्रीसह मराठी शिकवणारी (Marathi language teaching) पुस्तकेही तयार करण्यात आली आहेत. रिक्षाचालक व टॅक्सीचालकांसाठी मराठी, परिचारिकांसाठी (नर्सेससाठी) मराठी, बँक कर्मचाऱ्यांसाठी मराठी, तसेच शासकीय कर्मचाऱ्यांसाठी मराठी, असे विविध अभ्यासक्रम देखील तयार करण्यात आले आहेत.

मुंबई विद्यापीठाच्या जर्मन विभागामार्फत काही वर्षापासून ऑनलाइन प्रत्यक्ष संवादात्मक मराठी अभ्यासक्रम राबविले जात आहेत. या अभ्यासक्रमातून विद्यार्थ्यांना मराठी बोलणे, वाचणे, लेखन आणि ऐकणे (समजून घेणे) ही कौशल्ये शिकवली जातात. यासोबतच व्याकरण आणि संवाद कौशल्याचा सखोल सराव करून घेतला जातो. प्रमाणपत्र अभ्यासक्रम हा स्तर १ म्हणजे नव्याने शिकणाऱ्यांसाठी आहे. त्याचे वर्ग रविवारी सकाळी ९:०० ते दुपारी १:०० या वेळेत एक वर्षासाठी ऑनलाइन पद्धतीने शिकवले जातात.

शिक्षक-शिक्षकेतर पदे भरण्यास हिरवा कंदिल, आकृतिबंध पूर्ण करण्याच्या सूचना

संवादात्मक मराठी अभ्यासक्रमांचे एकूण ६ स्तर आहेत. सध्या पहिले तीन स्तर मुंबई विद्यापीठाच्या जर्मन विभागामार्फत शिकवले जात आहेत. हे अभ्यासक्रम भारतीय आणि विदेशी विद्यार्थ्यांमध्ये अतिशय लोकप्रिय आहेत. मराठी शिकण्यासाठी सर्व पुस्तके आणि ऑडिओ व्हिज्युअल साहित्य मुंबई विद्यापीठाच्या संकेतस्थळावर विनामूल्य डाउनलोड करण्यासाठी उपलब्ध करून दिले आहेत. तसेच ऑनलाइन मराठी अभ्यासक्रमांची प्रवेश प्रक्रिया याच संकेतस्थळावर उपलब्ध असल्याचे विभागप्रमुख प्रा. विभा सुराणा यांनी सांगितले.