पुण्याच्या वाघोली परीसरातील 'किड्झी प्री-स्कूल'ला भीषण आग

एज्युवार्ता न्यूज नेटवर्क 

वाघोली येथील (Fire in Wagholi) आय. व्ही. इस्टेट परिसरातील किड्झी प्री-स्कूलमध्ये (Kidzie Pre-Scho) रविवारी रात्री लागलेल्या आगीत एका गॅस सिलेंडरचा स्फोट (Gas Cylinder Explosion) झाला. सुदैवाने ही घटना रविवारी शाळेला सुटी असल्याने आणि रात्रीची वेळ असल्याने अनर्थ टळला. मात्र, आगीमध्ये शाळेच्या वस्तू, पुस्तके आणि इतर साहित्याचे (School materials burnt down) मोठे नुकसान झाले आहे.

आगीची माहिती मिळताच वाघोली अग्निनामक केंद्राचे पथक तातडीने घटनास्थळी दाखल झाले. आग लागलेल्या ठिकाणी दोन गॅस सिलेंडर असल्याने धोका वाढला होता. मात्र, आग भीषण असल्याने दोन पैकी एका सिलेंडरचा स्फोट झाला.

अशा परिस्थितीतही जवानांनी सावधगिरीने दुसरा सिलेंडर बाहेर काढला. आगीची भीषणता लक्षात घेता महापालिकेच्या खराडी अग्निशामक केंद्राचे दोन गाड्या, आणि अपात्कालीन विभागाला मदतीसाठी तातडीने पाचारण करण्यात आले होते. दोन्ही दलांच्या संयुक्त प्रयत्नांनंतर आगीवर नियंत्रण मिळवण्यात यश आले.

दरम्यान, या भीषण आगीचा आता एक धक्कादायक व्हिडिओ समोर आला आहे. या व्हिडिओमध्ये आगीदरम्यान जोरदार स्फोट झाल्याचे स्पष्टपणे दिसत असून, हा स्फोट नेमका कशाचा झाला याबाबत विविध तर्क-वितर्क व्यक्त केले जात आहेत. समोर आलेल्या व्हिडिओमध्ये स्फोटाचा आवाज इतका मोठा होता की परिसरात एकच खळबळ उडाली होती. 

सुदैवाने या घटनेतील जीवितहानी टळली असली तरी, आगीमुळे शाळेची इमारत, फर्निचर, पुस्तके आणि इतर शैक्षणिक साहित्याचे मोठ्या प्रमाणात नुकसान झाले आहे. ही आग नेमकी कशामुळे लागली, याचा तपास अग्निशमन दल व संबंधित यंत्रणांकडून सुरू असून, अधिकृत अहवालानंतरच याबाबत स्पष्टता येणार आहे.