MPSC : राज्य सेवा मुख्य परीक्षा २०२४ चा अंतिम निकाल प्रसिद्ध, सोलापूरचा विजय लामकाने राज्यात पहिला
आज राज्य सेवा मुख्य परीक्षा-२०२४ चा अंतिम निकाल लागला आहे. राज्यभरातील तब्बल ४६१ यशवंत उमेदवार जे अनेक वर्षांपासून मेहनत घेत होते, अभ्यास करत होते त्यांच्यासाठी हा सोनेरी दिवस आहे.
eduvarta@gmail.com 
एज्युवार्त न्यूज नेटवर्क
महाराष्ट्र लोकसेवा आयोगाकडून (Maharashtra Public Service Commission) घेतल्या जाणाऱ्या राज्य सेवा मुख्य परीक्षा-२०२४ (State Services Main Exam-2024) परीक्षेच्या निकालाची प्रतीक्षा करणाऱ्या हजारो तरुणांसाठी महत्त्वाची बातमी समोर आली आहे. आयोगाकडून राज्य सेवा मुख्य परीक्षा-२०२४ चा अंतिम निकाल आयोगाच्या संकेतस्थळावर प्रसिध्द (Results Announced) करण्यात आला आहे. या परीक्षेत सोलापूर जिल्ह्याने उल्लेखनीय यश मिळवले आहे. सोलापूर येथील विजय नागनाथ लामकाने याने सर्वसाधारण तसेच मागासवर्गीय गटातून राज्यात प्रथम क्रमांक पटकावला आहे. तर महिलांमधून सोलापूरच्याच आरती परमेश्वर जाधव या राज्यात प्रथम आल्या आहेत.
आयोगाकडून दिलेल्या माहितीनुसार, महाराष्ट्र लोकसेवा अयोगातर्फे दिनांक २७ ते २९ मे, २०२५ या कालावधीत घेण्यात आलेल्या परीक्षेचा निकाल आज बुधवार दि. ८ एप्रिल २०२६ रोजी आयोगाच्या संकेतस्थळावर प्रसिद्ध करण्यात आला आहे. त्यानुसार विविध २० संवर्गातील एकूण ४६१ पदांवर उमेदवारांची शिफारस करण्यात येत असल्याचे आयोगाकडून सांगण्यात आले आहे.
आयोगाने उमेदवारांच्या माहितीसाठी अंतिम निकालासोबतच प्रत्येक प्रवर्गासाठी शिफारसपात्र ठरलेल्या शेवटच्या उमेदवाराचे गुण (कट-ऑफ) अधिकृत संकेतस्थळावर प्रसिद्ध केले आहेत. यामुळे उमेदवारांना स्वतःची कामगिरी आणि स्पर्धेची पातळी समजण्यास मदत होणार आहे.
दरम्यान, आयोगाने स्पष्ट केले आहे की, अंतिम निकालाद्वारे शिफारस करण्यात आलेल्या उमेदवारांची नियुक्ती ही त्यांच्या आवेदनपत्रातील माहिती आणि दाव्यांच्या पडताळणीवर आधारित असेल. नियुक्तीच्या वेळी मूळ प्रमाणपत्रांची तपासणी केली जाईल. जर कोणतीही माहिती खोटी किंवा अपूर्ण आढळली, तर संबंधित उमेदवाराची उमेदवारी कोणत्याही टप्प्यावर रद्द केली जाऊ शकते.
हा निकाल विविध न्यायालयीन प्रकरणांतील अंतिम निर्णयाच्या अधीन राहून जाहीर करण्यात आला आहे. विशेषतः मुंबई उच्च न्यायालय येथे दाखल रिट याचिका क्र. 1746/2026 संदर्भात दिलेल्या आदेशानुसार काही उमेदवारांचा निकालात समावेश करण्यात आला आहे. मात्र प्रशासकीय कारणास्तव त्यांची शिफारस सध्या राखून ठेवण्यात आली आहे. तसेच दिव्यांग, अनाथ, खेळाडू आणि मागासवर्गीय प्रवर्गासाठी आरक्षित पदांवरील उमेदवारांची शिफारस सक्षम प्राधिकरणाच्या पडताळणीच्या अधीन राहणार आहे. या निकालामुळे राज्यातील स्पर्धा परीक्षा देणाऱ्या उमेदवारांमध्ये उत्साहाचे वातावरण निर्माण झाले आहे.
____________________________________
आज राज्य सेवा मुख्य परीक्षा-२०२४ चा अंतिम निकाल लागला आहे. राज्यभरातील तब्बल ४६१ यशवंत उमेदवार जे अनेक वर्षांपासून मेहनत घेत होते, अभ्यास करत होते त्यांच्यासाठी हा सोनेरी दिवस आहे.
- महेश घरबुडे, अध्यक्ष, स्पर्धा परीक्षा विद्यार्थी असोसिएशन
