MPSC : महाराष्ट्र गट-ब संयुक्त भरती २०२६ जाहीर; ७५८ पदांसाठी अर्ज प्रक्रिया सुरू

एज्युवार्त न्यूज नेटवर्क 

महाराष्ट्र लोकसेवा आयोग (MPSC) मार्फत महाराष्ट्र गट-ब (अराजपत्रित) सेवा संयुक्त भरती २०२६ ची (Services Joint Recruitment 2026) अधिकृत अधिसूचना जाहीर करण्यात आली आहे. या भरतीअंतर्गत एकूण ७५८ रिक्त पदे (758 vacant posts) भरण्यात येणार असून पात्र उमेदवारांकडून ऑनलाईन अर्ज मागविण्यात येत आहेत. राज्यातील स्पर्धा परीक्षा देणाऱ्या उमेदवारांसाठी ही मोठी संधी मानली जात आहे. या भरती प्रक्रियेसाठी आज ८ एप्रिलपासून ऑनलाइन पद्धतीने अर्ज प्रक्रिया सुरू (Application process started) करण्यात आली आहे. अर्ज करण्याची अंतिम मुदत २२ एप्रिल (Deadline April 22) २०२६ पर्यंत देण्यात आली आहे. 

या भरती मोहिमेअंतर्गत सहायक कक्ष अधिकारी -०३ पदे, राज्य कर निरीक्षक -२७९ पदे, पोलीस उपनिरीक्षक -३९२ पदे, तसेच दुय्यम निबंधक (श्रेणी-१) / मुद्रांक निरीक्षक या गट-ब -८४ पदांचा समावेश आहे. विविध विभागांतील ही पदे प्रशासन, महसूल आणि पोलिस यंत्रणेत महत्त्वाची मानली जातात. 

शैक्षणिक पात्रता ही पदानुसार वेगवेगळी असून, साधारणपणे मान्यताप्राप्त विद्यापीठाची पदवी आवश्यक आहे. काही पदांसाठी विशिष्ट शारीरिक पात्रताही लागू असू शकते, विशेषतः पोलीस उपनिरीक्षक पदासाठी. तसेच उमेदवारांचे वय, आरक्षणनिहाय सवलती आणि इतर अटी आयोगाच्या अधिसूचनेनुसार लागू राहतील. खुला प्रवर्गातील उमेदवारांना ५४४ रुपये परीक्षा शुल्क भरावा लागेल तर, मागासवर्गीय विद्यार्थ्यांना ३४४ रुपये अर्ज शुल्क भरायचा आहे. 

या भरती प्रक्रियेत पूर्व परीक्षा, मुख्य परीक्षा आणि मुलाखत अशा टप्प्यांद्वारे उमेदवारांची निवड केली जाणार आहे. स्पर्धा परीक्षा देणाऱ्या विद्यार्थ्यांसाठी ही भरती अत्यंत महत्त्वाची मानली जाते. या भरतीकडे राज्यातील हजारो उमेदवारांच्या नजरा होत्या. त्यामुळे इच्छुकांनी वेळेवर अर्ज करून परीक्षेची तयारी सुरू करण्याचे आवाहन करण्यात आले आहे.